Шаноўныя наведвальнікі музеяў і проста аматары света мастацтва і прыгажосці! Філіял Нацыянальнага мастацкага музея Рэспублікі Беларусь «Дом Ваньковічаў. Культура і мастацтва першай паловы ХІХ стагоддзя» прапануе вашай увазе шэраг культурна-адукацыйных праектаў, якія дадуць магчымасць апынуцца ў атмасферы незвычайных эмоцый і духоўных перажыванняў, пазнаёмяць з сядзібнай культурай і мастацтвам першай паловы ХІХ стагоддзя, падораць іншае адчуванне мінулага і нацыянальнай гісторыі!

Праграма "Каляды ў сядзібным доме Ваньковічаў". У кожнага чалавека ёсць нейкая свая патаемная мара, здзяйснення якой мы вельмі чакаем ў пару самага таямнічага і прыгожага зімовага свята – нараджэння Хрыстова – галоўнага свята сям'і... Магчыма, гэтая мара ажыве ў нашым шляхецкім доме падчас музейнай праграмы, прысвечанай гэтаму цудоўнаму дню! І вы зможаце не толькі акунуцца ў святочны настрой старадаўніх часоў, даведацца пра традыцыі і абрады святкавання галоўнага хрысціянскага свята ў шляхецкім асяроддзі, сустрэцца з чароўным светам мастацтва ХІХ ст., адноўленага ў інтэр'ерах і арыгінальных творах мастацтва, але і перажыць светлыя і хвалюючыя эмоцыі, захапленне, адчуць цеплыню і любоў сямейнага свята! Праграма адрасавана сямейнай аўдыторыі (не больш за 10 удзельнікаў) і праводзіцца толькі два месяцы ў год – у снежні і студзені. Заяўкі прымаюцца з 1 лістапада.

Адрас музея: вул. Інтэрнацыянальная, 33а. Экспазіцыя музея адкрыта для наведвальнікаў з серады па нядзелю, з 10.00 да 18.00
Музейныя заняткі, праграмы і экскурсіі можна замовіць па тэл. 227-87-96