З Рымскай Кампаньі. Вёска Арычча - Нацыянальны Мастацкі Музей Рэспублікі Беларусь

У 1869–1872 гг. Уладзімір Арлоўскі тры гады правёў у Еўропе як пенсіянер Імператарскай Акадэміі мастацтваў. Ён наведаў Францыю, Германію, Швейцарыю і Італію – дастаткова стандартны спіс краін, які выбіралі пейзажысты XIX стагоддзя для ўдасканальвання. Вывучыўшы дзве мастацкія школы – французскую і нямецкую – ён накіраваўся ў Італію, таму што ў Швейцарыі пахаладала і стала цяжка працаваць. Гэтая карціна была напісана мастаком у Арыччы (Ariccia) – маленькім мястэчку, якое ў XIX стагоддзі знаходзілася ўсяго ў 19 км ад Рыма, каля Альбана. Яно было любімым дачным месцам рымлян, а таксама мастакоў, якія прыехалі працаваць у Італію, дзякуючы маляўнічаму размяшчэнню на ўзгорку, з якога адкрываўся прыгожы від на наваколле. Пейзаж быў пасланы мастаком на Гадавую выставу ў залах Акадэміі мастацтваў у 1872 і па паказальніку выставы называецца “З Рымскай Кампаньі. Вёска Арычча” (№ 302 bis).