Бібліятэка і архіў

Бібліятэчны сектар

 

Загадчык – Занкавец Вольга Віктараўна

Вядучы бібліятэкар – Баранава Таццяна Валянцінаўна

Тэл.: +375 (17) 327 71 67

E-mail: biblioteka@artmuseum.by

220030, г. Мінск, вул. Леніна, 22

Бібліятэка Нацыянальнага мастацкага музея Рэспублікі Беларусь – структурнае падраздзяленне, якое выконвае функцыі спецыяльнай бібліятэкі: з’яўляецца навуковай базай даследчай, метадычнай і фондавай работы музея.

Асноўная задача бібліятэкі – забеспячэнне прафесійных патрэб спецыялістаў музея і іншых карыстальнікаў для навукова-даследчай, рэстаўрацыйнай, экспазіцыйна-выставачнай, адукацыйнай, асветніцкай і выдавецкай дзейнасці.

Фонд бібліятэкі налічвае 40 тысяч адзінак кніг і перыядычных выданняў. Асобна вылучаны наступныя калекцыі:

  • каталогі выстаў Беларусі і іншых краін;
  • каталогі персанальных выстаў мастакоў;
  • калекцыя рэдкіх кніг;
  • калекцыя паштовак;
  • калекцыя перыядычных выданняў;
  • калекцыя газетных выразак.

Камплектаванне бібліятэчнага фонду ў першую чаргу арыентавана на вывучэнне і даследаванне калекцый музея – старажытнабеларускага і сучаснага беларускага мастацтва, рускага мастацтва і мастацтва краін Заходняй Еўропы і Усходу.

Бібліятэка Нацыянальнага мастацкага музея даступная для навуковых супрацоўнікаў музеяў Беларусі, мастацтвазнаўцаў, культуролагаў, дзеячаў мастацтва, выкладчыкаў, аспірантаў і студэнтаў вышэйшых навучальных устаноў, якія могуць карыстацца чытальнай залай бібліятэкі з дазволу адміністрацыі музея.

 

Архіў

 

Вядучы архівіст – Радзівонава Наталля Генадзьеўна

Вядучы архівіст – Хоміч Таццяна Уладзіміраўна

Тэл.: + 375 (17) 363 61 17

Адрас: 220030, г. Мінск, вул. Леніна, 22, каб. 302

Архіў Нацыянальнага мастацкага музея Рэспублікі Беларусь – неад’емная частка музея, якая захоўвае яго гісторыю ў дакументах, фотаздымках, творчых матэрыялах. Па сутнасці, архіў фарміруе летапіс музея. У дакументах, якія прымаюцца архівам на пастаяннае захоўванне ад навуковых аддзелаў музея, супрацоўнікаў і прыватных асоб, адбіваюцца ўсе асноўныя вехі гісторыі музея: стварэнне, пасляваеннае адраджэнне і развіццё, сучасны стан.

Задача архіва складаецца ў тым, каб назапасіць, улічыць, папоўніць музейны фонд каштоўнымі крыніцамі культурнага і навуковага значэння, якія маглі б вычарпальна расказаць пра жыццё і дзейнасць музея і захаваць для будучага гэты гістарычны багаж.

Архіў з’явіўся ў структуры музея ў 1994 годзе. Яго стваральнікам і нязменным захавальнікам доўгі час з’яўлялася Валянціна Фёдараўна Баслык. За 25 гадоў карпатлівай працы было сабрана і апрацавана больш за 10 000 архіўных спраў, сабраны каштоўныя навуковыя картатэкі і калекцыі асабістых дакументаў вядомых беларускіх мастакоў, мастацтвазнаўцаў, навуковых супрацоўнікаў музея і яго першых дырэктараў: М. П. Міхалапа, А. В. Аладавай, Ю. А. Карачуна.

Навукова-тэхнічная апрацоўка дакументальных матэрыялаў, якія паступаюць у архіў з навуковых аддзелаў музея, ад прыватных асоб, патрабуе ўважлівага вывучэння і ўседлівасці. Сучасныя патрабаванні ў дакументазнаўстве вызначаюць неабходнасць наяўнасці спецыяльных ведаў і навыкаў работы з дакументамі, профільнай адукацыі. У сваёй працы супрацоўнікі архіва карыстаюцца нарматыўна-прававымі актамі Рэспублікі Беларусь і метадычнымі рэкамендацыямі Дэпартамента па архівах і справаводстве Міністэрства юстыцыі Рэспублікі Беларусь.

У архіве музея захоўваюцца наступныя дакументы:

- арганізацыйна-распарадчыя па асноўнай дзейнасці музея: загады, планы, справаздачы, пратаколы пасяджэнняў навуковых саветаў, матэрыялы канферэнцый, семінараў, “круглых сталоў” і інш.;

- па асабовым складзе: асабістыя справы супрацоўнікаў музея, уліковыя карткі, загады па асабовым складзе і інш.;

- негатывы і фатаграфіі, відэа- і аўдыёкасеты, слайды: калекцыі музея, справаздачы пра творчыя экспедыцыі і значныя мерапрыемствы культурнага жыцця;

- матэрыялы выстаў розных гадоў, якія сталі часткай гісторыі: каталогі, буклеты, прэс-рэлізы, эксплікацыі, афішы, водгукі наведвальнікаў і г.д.;

- асноўную частку архіўнага фонду складаюць дакументы з асабістых архіваў і калекцый вядомых мастакоў, мастацтвазнаўцаў, навуковых супрацоўнікаў і дырэктараў музея. Многія з іх прысвяцілі большую частку свайго жыцця справе вывучэння і прапагандзе мастацтва. У архіве захоўваюцца аўтарскія рукапісныя тэксты артыкулаў, даследаванняў, атрыбуцыі, з якіх пасля склаліся сур’ёзныя даследчыя работы: манаграфіі, раздзелы энцыклапедый, аўтарытэтныя атрыбуцыі і каталогі;

- навукова-даведачны апарат прадстаўлены ў выглядзе 16 картатэк па розных напрамках дзейнасці музея.

Гісторыя Нацыянальнага мастацкага музея, а разам з ёй і гісторыя архіва працягваюцца. Архіўныя дакументы запатрабаваны ў дзейнасці навуковых супрацоўнікаў музея для напісання мастацтвазнаўчых артыкулаў, даследаванняў, стварэння экспазіцый выстаў.

Матэрыяламі архіва з дазволу адміністрацыі музея могуць карыстацца таксама супрацоўнікі іншых устаноў, аспіранты, студэнты і выкладчыкі навучальных устаноў краіны, пісьменнікі, мастакі, прадстаўнікі сродкаў масавай інфармацыі.

частыя пытанні

Дзе я магу прыпаркаваць аўтамабіль?

Бліжэйшыя парковачныя месцы знаходзяцца ўздоўж вул. Карла Маркса (паркоўка платная)

Ці можна знаходзіцца ў музеі ў верхнім адзенні?

Правілы наведвання музея не прадугледжваюць наведванне экспазіцыі ў верхнім адзенні. Яго неабходна пакінуць у гардэробе.

З якімі рэчамі знаходзіцца ў музейных залах нельга?

Усе сумкі, заплечнікі і пакеты памерам больш за 30х40х20 см, а таксама, парасоны неабходна здаць у гардэроб ці пакінуць у камеры захоўвання. Бутэлькі з вадой праносіць на экспазіцыю нельга, піць ваду можна ў вестыбюлі ці музейным кафэ на першым паверсе.

Ці можна наведваць экспазіцыю музея з дзіцячай каляскай?

Так, мы рады наведвальнікам узроставай катэгорыі 0+. 

Ці ёсць зніжкі на набыццё ўваходнага білета для пенсіянераў?

Ільготы (зніжка 50% на ўваходныя білеты) для людзей пенсійнага ўзросту ў музеі прадугледжаны ў апошнюю сераду кожнага месяца і ў першы панядзелак кожнага месяца.

Якія ўмовы створаны для наведвання людзей з абмежаванымі магчымасцямі?

Для бесперашкоднага вывучэння экспазіцыі на верхніх паверхах у музеі ёсць спецыяльны пад’ёмнік. Калі ён неабходны для Вашага візіту ў музей, калі ласка, патэлефануйце адміністратару экскурсійнага бюро па гарадскім нумары: 397-01-63 альбо 342-87-87.

У экспазіцыі новага корпуса знаходзяцца спецыяльныя карціны і скульптуры для тактыльнага вывучэння, абсталяваныя гукавым запісам з падрабязным апісаннем твораў.

Ці існуе ў музеі дзень бясплатнага наведвання?

Апошняя серада месяца – дзень ільготнага наведвання. Уваходны білет у апошнюю сераду кожнага месяца складае 4 руб. для дарослых, 2 руб. для школьнікаў і студэнтаў дзённай формы навучання.

Ці ёсць у музеі аўдыягід?

Паслуга аўдыягіда аплачваецца пры наведванні ў сувенірным кіёску музея. Аўдыягіды па пастаяннай экспазіцыі музея даступныя на беларускай, рускай, англійскай і кітайскай мовах.

Як мне трапіць на экскурсію?

У экскурсійным бюро адбываецца запіс арганізаваных груп ад пяці чалавек і індывідуальных экскурсій (груп да пяці чалавек).

Запісвацца неабходна як мінімум за тыдзень да меркаванага візіту па гарадскім тэлефоне: 397-01-63. У рамках акцый і спецыяльных мерапрыемстваў музей нярэдка наладжвае зборныя экскурсіі па ўваходным білеце ў музей.

Падрабязная афіша ўсіх падзей публікуецца ў раздзеле “Навіны”.