Выставачны праект “Іван Ахрэмчык. Майстар. Людзі. Эпоха” знаёміць з творчай спадчынай мастака.
З урачыстым словам на адкрыцці выступілі намеснік генеральнага дырэктара па навуковай і асветніцкай рабоце Нацыянальнага мастацкага музея Рэспублікі Беларусь Вікторыя Аляксандраўна Кузьміна; першы намеснік старшыні Беларускага саюза мастакоў Наталля Васільеўна Шаранговіч; дырэктар Беларускага дзяржаўнага архіва-музея літаратуры і мастацтва Алена Аляксандраўна Макаранка; заслужаны дзеяч мастацтваў Рэспублікі Беларусь Уладзімір Васільевіч Уродніч; заслужаны дзеяч мастацтваў Рэспублікі Беларусь Мікалай Апанасавіч Апіёк; члены сям'і Івана Восіпавіча Ахрэмчыка.
Музычным афармленнем цырымоніі адкрыцця сталі выступленні Мітрапалічага хору Свята-Духава кафедральнага сабора г. Мінска, навучэнцаў Дзіцячай музычнай школы мастацтваў №1 ім. Л. П. Александроўскай і Дзіцячай музычнай школы мастацтваў №18 г. Мінска.
І. В. Ахрэмчык працаваў у тэхніцы алейнага жывапісу ў многіх жанрах станковай карціны: партрэт, пейзаж, нацюрморт, буйнафарматныя работы на гістарычную тэму, ствараў таксама і манументальныя палотны. Іван Ахрэмчык з’яўляецца аўтарам адной з самых вядомых і значных работ на ваенную тэматыку “Абаронцы Брэсцкай крэпасці” (1957), якая ўваходзіць у пастаянную экспазіцыю музея.
На працягу ўсяго творчага шляху Івана Восіпавіча самымі ўпадабанымі жанрамі былі партрэт і пейзаж. Для партрэтаў пэндзля Івана Ахрэмчыка характэрна перадача ўнутранага эмацыйнага стану партрэтаванага, глыбіня яго характару. У пейзажах адлюстравана лірычная прыгажосць беларускай прыроды. У лясах і парках, палях і рэках можна ўбачыць чысціню колеру, вострае адлюстраванне нюансаў тону. Палітра мастака складаная па задуме, утрымлівае мноства градацый, з дапамогай якіх раскрываецца аўтарскае бачанне прыгажосці ў штодзённым.
На выставе прадстаўлены работы з фондаў Нацыянальнага мастацкага музея Рэспублікі Беларусь, матэрыялы і фотаздымкі з Беларускага дзяржаўнага архіва-музея літаратуры і мастацтва.
Выстава будзе працаваць да 21 студзеня 2024 года.
