"Беларускія краявіды Апалінарыя і Іпаліта Гараўскіх" — другая лекцыя цыкла, прысвечанага творчасці беларускага мастака XIX стагоддзя Апалінарыя Гараўскага (1833—1900) і яго брата Іпаліта Гараўскага (1828—1884). Яна адбудзецца 13 студзеня (субота) а 15-й гадзіне.
XIX стагоддзе — час велізарнай папулярнасці пейзажнага жанру, у якім яскрава сцвердзіліся браты Гараўскія. Рэалістычна перададзеныя пэндзлем акадэмічных мастакоў краявіды Беларусі і сёння чаруюць гледача гармоніяй і яснасцю.
На лекцыі, акрамя панарамы беларускіх відаў, вас чакаюць дэтэктыўныя гісторыі аб здабыцці мастацкіх работ, якія лічыліся страчанымі, і іх атрыбуцыі.
Лекцыю чытае Юлія Лісай — вядучы навуковы супрацоўнік Мастацкага музея. А даследчык-архівіст і аглядальнік газеты "Культура" Зміцер Юркевіч раскажа пра новыя адкрыцці ў даследаванні роду Гараўскіх.
Наведаць лекцыю можна па ўваходным білеце ў галоўны корпус музея (Леніна, 20). Рэгістрацыя не патрабуецца.
