Сучасная бібліятэка – не толькі асяродак захавання кніжнай спадчыны, але і цэнтр навукова-асветніцкай дзейнасці, без якога цяжка ўявіць культурную прастору сучаснай Беларусі. Юбілей галоўнай кніжніцы краіны стаў важнай падзеяй для нацыянальнай культуры і добрай нагодай яшчэ раз звярнуцца да скарбаў айчыннага пісьменства, асэнсаваць традыцыі і адметнасць беларускай кнігі, дакрануцца да гісторыі і таямніц найстарэйшага кнігасховішча, акрэсліць ролю бібліятэк у асветніцкай дзейнасці педагогаў, навукоўцаў, літаратараў.
Менавіта да гэтага імкнуліся шматлікія аўтары часопіснага раздзела “І мудрасці, і ведаў храм”, які на працягу бягучага года выходзіў у кожным нумары “Роднага слова” пры падтрымцы Нацыянальнай бібліятэкі Беларусі і Нацыянальнага мастацкага музея. Мастацкім увасабленнем праекта сталі творы са збору музея, аб’яднаныя эпіграфічнымі словамі Францыска Скарыны: “Любіце кнігу, бо яна – крыніца ведаў, мудрасці і навукі, лекі для душы”. Некаторыя з гэтых твораў будуць прадстаўлены падчас прэзентацыі (чытачы часопіса змаглі ўбачыць 21 мастацкую работу, у тым ліку тыя, што рэдка пакідаюць музейныя фонды).
Круглы стол – фінальнае мерапрыемства супольнага праекта, да ўдзелу ў ім запрошаны прадстаўнікі навуковай і літаратурна-выдавецкай грамадскасці, у тым ліку аўтары часопіса “Роднае слова”, якія абмяркуюць ролю кнігі ў культуратворчых працэсах сучаснасці.
Музычныя госці – хор Gaudeamus, а таксама ансамбль флейтыстаў “Флюід” і квартэт струнных інструментаў Мінскага дзяржаўнага музычнага каледжа імя М. І. Глінкі.
