Леанід Шчамялёў (1923–2021) – фігура легендарная для беларускага і савецкага мастацтва. Заслужаны дзеяч мастацтваў БССР (1977), народны мастак Беларусі (1983), лаўрэат Дзяржаўнай прэміі БССР (1982), прэміі Саюзнай дзяржавы ў галіне літаратуры і мастацтва (2009) – у гісторыі нашай выяўленчай культуры другой паловы ХХ стагоддзя і першых двух дзесяцігоддзяў ХХІ ён адыграў асаблівую ролю.
Прайшоўшы суровую школу жыцця, быўшы ўдзельнікам Вялікай Айчыннай вайны, Леанід Дзмітрыевіч Шчамялёў, як ніхто іншы, змог стварыць вытанчаную і разам з тым лірычную паэму пра жыццё чалавека ва ўсёй яго складанасці: аб “…сучаснасці і гісторыі краіны, каханні і суму, радасці чалавечай і надзеі, аб прыгажосці зямлі і настальгічных успамінах маладосці”, – як адзначыў вядомы беларускі мастацтвазнаўца, найбуйнейшы даследчык творчасці мастака Барыс Аляксеевіч Крэпак.
Мастак тварыў практычна ва ўсіх жанрах жывапісу: ад фігуратыўнай карціны да нацюрморта, ад лірычнага і эпічнага пейзажаў да кампазіцыйнага партрэта, шмат працаваў у графіцы.
У фокусе ўвагі цяперашняй юбілейнай выставы-рэтраспектывы ў Нацыянальным мастацкім музеі Рэспублікі Беларусь будуць творы майстра, сабраныя з дзяржаўных і прыватных калекцый, якія адлюстроўваюць асноўныя этапы і галоўныя напрамкі мастацкіх пошукаў мастака ў шырокім часавым дыяпазоне. Экспазіцыя прадставіць увесь шлях Шчамялёва-жывапісца: ад дыпломнай работы да твораў апошніх гадоў, ад буйнафарматных праграмных работ да эцюдаў і невялікіх замалёвак.
Творы Л. Д. Шчамялёва знаходзяцца ў калекцыях Нацыянальнага мастацкага музея Рэспублікі Беларусь, Музея гісторыі горада Мінска, многіх абласных і раённых музеяў Беларусі, Дзяржаўнай Траццякоўскай галерэі (г. Масква), у фондах Міністэрства культуры Расійскай Федэрацыі, Беларускага саюза мастакоў і прыватных зборах.
Работа выставы працягнецца
да 2 красавіка 2023 года
