7 красавіка (нядзеля) а 14-й гадзіне ў Мастацкім адбудзецца лекцыя “Мастацтва Францыі XVII стагоддзя”, якой распачнецца цыкл штотыднёвых лекцый пра французскае мастацтва.
Падчас першай лекцыі гаворка пойдзе пра класіцызм – стыль, які арыентуецца на каноны антычнага мастацтва. У жывапісе ўсхваляўся вобраз “караля-сонца” – Людовіка XIV, што правіў у той час, тады ж быў пабудаваны палацава-паркавы ансамбль Версаль, які стаў выдатным помнікам эпохі, адметнай унікальнай цэласнасцю задумы і гармоніяй архітэктурных формаў. Пра гэты перыяд у гісторыі французскага мастацтва і пра выдатных дзеячаў эпохі і пойдзе размова на лекцыі.
Лекцыю чытае вядучы навуковы супрацоўнік Мастацкага – Алена Дзмітрыеўна Шапашнікава, якая працуе ў музеі больш за 40 гадоў.
Наведаць мерапрыемства можна па ўваходным білеце ў галоўны корпус музея (Леніна, 20; сяродкрыжжа). Папярэдняя рэгістрацыя не патрабуецца.
