30 красавіка 2026 года ў 17.00 ў Нацыянальным мастацкім музеі Рэспублікі Беларусь (вул. Леніна, 20а, сяродкрыжжа) адбудзецца ўрачыстае адкрыццё выставы “Мікалай Байрачны. Скульптура. Да 75-годдзя майстра”.
Выстава скульптуры Мікалая Байрачнага, шматграннага мастака, які працуе ў такіх напрамках, як кераміка, станковая скульптура, кніжная ілюстрацыя і мультыплікацыя – гэта першая персанальная выстава аўтара ў сценах Нацыянальнага мастацкага музея Рэспублікі Беларусь.
Рознабаковая экспазіцыя прадэманструе аўтабіяграфічныя творы, натхнёныя гісторыямі жыцця продкаў мастака – прадзеда, дзеда і бацькі, а таксама казачныя пераасэнсаванні вобразаў дачкі, унука і ўнучкі Мікалая Іванавіча (цыкл “Калі феі былі маленькімі”). Асобная частка выставы прысвечана унікальнай па тэхніцы выканання і спалучэнні матэрыялаў (мармур, бронза, граніт, сталь, сердалік і нават дрэва), неверагодна дэталізаванай анімалістычнай скульптуры, створанай Мікалаем Байрачным у сааўтарстве з калегай-майстрам Юрыем Гудзіновічам.
Кожная скульптура – гэта займальны аповед, легенда, у якой за відавочным сэнсам абавязкова ёсць зашыфраваныя таямніцы старажытных ведаў і рамантычныя гісторыі, якія неабходна разгадаць.
Усе творы, прадстаўленыя ў экспазіцыі, з’яўляюцца ўласнасцю аўтара.
Выстава будзе экспаніравацца па 25 мая 2026 года ў выставачным корпусе Нацыянальнага мастацкага музея Рэспублікі Беларусь (вул. К. Маркса, 24, 4 паверх, 3 зала).
