Но синий цвет – небесный цвет, и грезою ответною
Просящему сознанию дает он ряд примет.
Примет лазурно-радостных нам в буднях много светится,
И пусть, как Море синее, дороги далеки,
«Дойдешь», тебе вещает лен, там в Небе все отметится,
«Дойдешь», твердят глаза детей, и шепчут васильки.
Канстанцін Бальмонт
16 мая 2026 з 19.00 да 01.00 адбудзецца самая доўгачаканая падзея года – “Ноч музеяў у Мастацкім”.
Раз у год надыходзіць ноч, калі мастацтва ажывае, а звыклыя залы музея ператвараюцца ў парталы паміж эпохамі. У гэту ноч мы запрашаем вас паглыбіцца ў самы загадкавы колер сусвету – сіні. “БОЛЬШ, ЧЫМ СІНІ” – гэта не проста тэма, гэта далучэнне да бясконцасці: ад глыбокага змроку да нябеснага блакіту, ад таямніцы марскіх глыбінь да рухомых ценяў на палотнах вядомых майстроў.
У выяўленчым мастацтве сіні прайшоў шлях ад каштоўнага ўльтрамарыну эпохі Адраджэння да “бясконцасці” Іва Кляйна і колеру кахання Марка Шагала.
Сіні колер, як магутны інструмент адлюстравання, зачароўвае не толькі мастакоў, але і гледачоў, застаючыся невычэрпнай крыніцай натхнення.
З усёй палітры колераў у якасці фірменнага колеру Мастацкі таксама выбраў менавіта сіні – сімвал даверу, глыбіні, спакою і ўзвышанасці. Як колер неба і вады, сіні асацыіруецца з бясконцасцю, сталасцю і сувяззю часоў. Як жа тут не ўзгадаць традыцыйны брэнд краіны – Беларусь сінявокая, край рэк і азëр, ільну і палявых валошак.
У Ноч музеяў у нас ёсць шмат нагод пагаварыць пра сіні, адчуць яго і пачуць.
Падрыхтуйцеся ўбачыць свет ва ўсіх адценнях сапфіру і індыга!
Генеральны партнёр акцыі – плацежная сістэма БЕЛКАРТ і “Музеі Беларусі разам з Белкарт”.
Таксама партнёрамі праекта выступаюць друкавальны цэнтр “Карандаш”, Афістон Маркет і Relouis.
Асобную паддзяку за падтрымку культурнай праграмы выказваем Мінскаму заводу безалкагольных напояў!
Кошт білета для дарослых – 20 рублёў, для навучэнцаў і студэнтаў – 11 рублёў. Уладальнікі карты госця НММ змогуць наведаць мерапрыемства бясплатна (па прад’яўленні адпаведнага дакумента).
Льготны білет (13 рублёў – дарослыя, 7 рублёў – навучэнцы і студэнты) для самых крэатыўных наведвальнікаў, якія прыйдуць у музей у арыгінальных сініх галаўных уборах ці сініх гальштуках-матыльках.
Уваход на выставу “Два стагоддзі моды ў Мастацкім ажыццяўляецца па асобным білеце.
Старт продажу білетаў пачнецца з 9 мая. Набыць іх можна ў касах музея (вул. Леніна, 20 і вул. К. Маркса, 24) і анлайн на сайце музея.
Куратар праекта - Дзіяна Шантар, загадчык аддзела навукова-асветніцкай работы і маркетынгу
