Юбілейная экспазіцыя прадстаўляе творчасць саюза народнага мастака Беларусі Георгія Паплаўскага і яго жонкі – таленавітага графіка Наталлі Паплаўскай.
Выстава прапануе гледачу ўнікальную магчымасць убачыць прыклад творчага адзінства, дзе “суровы стыль” Георгія Паплаўскага гарманічна спалучаецца з паэтычным і казачным светам Наталлі Паплаўскай. Экспазіцыя дазваляе не толькі пазнаёміцца з выдатнымі творамі графікі і жывапісу, але і адчуць эмоцыі мастакоў, дакрануцца да эпохі, у якой іх талент раскрыўся яскрава і шматгранна.
Георгій Георгіевіч Паплаўскі – ключавая фігура беларускага мастацтва другой паловы XX стагоддзя. Яго творчасць увабрала ў сябе дух часу. Майстар быў нястомным падарожнікам, які аб’ездзіў многія краіны і кантыненты – ад Індыі да Атлантыкі і Аўстраліі. Вялікую спадчыну майстра займае кніжная графіка: яго ілюстрацыі да твораў Янкі Купалы, Якуба Коласа, Уладзіміра Караткевіча і Васіля Быкава сталі класікай. Але ў дадзеным праекце прадстаўлены яго жывапісныя палотны, створаныя на аснове яскравых уражанняў ад далёкіх вандровак і прысвечаныя роднай прыродзе.
Наталля Паплаўская прадстаўлена на выставе не толькі як вядомы ілюстратар дзіцячых кніг, на якіх вырасла не адно пакаленне, але і як віртуозны майстар гравюры. Яе работы, прысвечаныя фальклору, традыцыям і самабытнасці Беларусі, адрозніваюцца глыбокай вобразнасцю і ўменнем напоўніць традыцыйны сюжэт сучасным гучаннем. Балансуючы на мяжы рэальнасці і міфа, мастачка стварае непаўторную атмасферу нацыянальнай ідэнтычнасці.
Запрашаем усіх жадаючых на гэту эмацыянальную і натхняльную экспазіцыю!
Выстава “Зніклае і вечнае. Георгій і Наталля Паплаўскія” працягнецца да 7 чэрвеня 2026 года.
Куратар выставы – Ульяна Караткевіч, малодшы навуковы супрацоўнік філіяла Нацыянальнага мастацкага музея Рэспублікі Беларусь “Музей В. К. Бялыніцкага-Бірулі”.
