Творчая спадчына Вадзіма Аркадзьевіча Качана вялікая, як і тэматычны дыяпазон яго работ: партрэт, жанравая (бытавая) фатаграфія, ню, прадметная фатаграфія (нацюрморт), дакументальная (рэпартажная) фатаграфія, пейзаж (перш за ўсё горад, архітэктура), канцэптуальная фатаграфія, інтэр’ер. Займаючыся фатаграфіяй больш за 30 гадоў, удзельнічаючы ў выставах у Беларусі і за мяжой, ён зрабіў сотні тысяч здымкаў, праявіў кіламетры плёнкі, паказаў дзясяткі тысяч сваіх работ. У сваёй творчасці апошняга дзесяцігоддзя мастак прытрымліваецца прынцыпу спалучэння класічнай чорна-белай фатаграфіі і найноўшых лічбавых тэхналогій.
На рэтраспектыўнай выставе ў Нацыянальным мастацкім музеі Рэспублікі Беларусь будуць прадстаўлены ў асноўным фотамантажныя чорна-белыя і каляровыя работы з калекцыі аўтара, выкананыя як у эпоху плёначнай фатаграфіі – 1980-я – пачатак 1990-х, так і ў лічбавы перыяд – з 2003 па сённяшні дзень. У экспазіцыі можна будзе ўбачыць і асабістыя рэчы майстра. Дапоўняць выставу відэафільмы пра мастака з фондаў Белтэлерадыёкампаніі.
Праграма правядзення выставы ўключае творчыя сустрэчы з Вадзімам Аркадзьевічам Качаном.
Экспанаванне выставы пройдзе з 18 мая па 24 чэрвеня 2024 года.
Куратар выставы – Анастасія Карнейка, старшы навуковы супрацоўнік аддзела беларускага мастацтва XX–XXI стст.
