Выставачны праект “Беларуская ваза” дэманструе разнастайнасць форм і роспісаў ваз, выпушчаных Мінскім фарфоравым заводам за ўсю гісторыю яго існавання (1951–2009) і створаных такімі аўтарамі, як Багданаў Леанід Якаўлевіч, Кірыленка Валянцін Антонавіч, Леантовіч Валерый Аляксеевіч, Літвіненка Ганна Васільеўна, Міхалап Мікалай Пракопавіч, Прохараў Іван Аляксандравіч, Фядусь Аляксей Якаўлевіч і інш.
Сярэдзіна ХХ стагоддзя – час зараджэння беларускага мастацкага фарфору і фаянсу. Значную ролю ў гэтым адыграў Мікалай Міхалап – мастак-кераміст, першы дырэктар Дзяржаўнай карціннай галерэі БССР, які 3 верасня 1945 года ўзначаліў сектар мастацкай прамысловасці Упраўлення па справах архітэктуры пры СНК БССР. Мінскі фарфоравы завод быў адным з новых прадпрыемстваў, створаных у савецкай краіне ў сярэдзіне XX стагоддзя для выпуску масавага фарфоравага посуду. У перыяд асваення фарфора-фаянсавай вытворчасці Мікалай Міхалап быў адзіным прафесійным кансультантам завода. Майстры завода пачалі асвойваць спецыфіку новых матэрыялаў і імкнуліся стварыць уласны ўнікальны стыль.
Дэкаратыўныя вазы сталі традыцыйным відам твораў Мінскага фарфоравага завода. У кераміцы і фарфоры другой паловы ХХ стагоддзя ваза паўстае як каштоўны пластычны твор, дзе ключавую ролю адыгрываюць сілуэт, контур, форма і каларыт.
Творы Мінскага фарфоравага завода атрымалі прызнанне не толькі ў Беларусі, але і за мяжой. Яны рэгулярна прадстаўляліся на міжнародных выставах, дзе неаднаразова ўдастойваліся ўзнагарод. Сёння вырабы завода набылі асаблівую каштоўнасць, бо ў 2009 годзе прадпрыемства было закрыта. Цяпер аўтарскі фарфор Мінскага фарфоравага завода – сапраўдная рэдкасць.
