У экспазіцыі прадстаўлена больш за 80 найлепшых твораў беларускіх мастачак і майстроў. Сярод іх – шэдэўры Раісы Кудрэвіч, Валяр’яны Жолтак, Нінэлі Шчаснай, Наталлі Паплаўскай, Людмілы Русавай, Зоі Літвінавай, Алены Бархатковай, Ларысы Журавовіч, Валянціны Сідаравай, Тамары Васюк і іншых. Экспануемыя творы ўяўляюць сабой разнастайныя віды выяўленчага і прыкладнога мастацтва: ад жывапісных палотнаў, скульптур і графічных аркушаў да ажурных выцінанак і саматканых ручнікоў.
Перад вачыма гледача паўстае галерэя партрэтаў жанчын самых розных лёсаў і прафесій. Таксама раскрываецца тэма сям’і і пераемнасці пакаленняў.
Важнай часткай экспазіцыі з’яўляюцца творы беларускага народнага мастацтва, у якіх адчуваецца сувязь мінулага і сучаснасці – тая адвечная чысціня пераемнасці, што стагоддзямі перадавалася ад маці да дачкі.
Часовая экспазіцыя працягнецца да 15 лістапада 2026 года.
