Выстава “Выяўленчае мастацтва Мардовіі” дэманструе асноўныя тэндэнцыі развіцця мастацтва Рэспублікі Мардовія ў кантэксце пераемнасці пакаленняў і захавання традыцыйных духоўна-маральных каштоўнасцей. Яна раскрывае багацце і разнастайнасць нацыянальных вобразаў і матываў, цесна звязаных з гісторыяй і традыцыямі эрзі і мокшы – дзвюх этнічных груп мардвы, блізкіх да фіна-ўгорскіх народаў.
У экспазіцыі прадстаўлена 60 твораў жывапісу, графікі, скульптуры, дэкаратыўна-прыкладнога мастацтва ад аўтараў, якія з’яўляюцца дзеючымі членамі Саюза мастакоў Расіі.
Мастацтва Мардовіі валодае шырокім жанрава-відавым спектрам і багатым стылістычным дыяпазонам: ад рэалістычнага мастацтва да авангарду. Традыцыі айчыннага мастацтва пераплятаюцца з міфалогіяй і фальклорам і творча пераасэнсоўваюцца ў разнастайных мастацкіх формах, што параджае ўнікальны вобраз мардоўскага мастацтва.
Мастакі Мардовіі ад першых прафесійных майстроў С.Д. Эрзі і Ф.В. Сычкова да класікаў выяўленчага мастацтва Мардовіі У.Д. Ілюхіна, А.А. Мухіна, Я.А. Наздрына, А.А. Радзівонава, В.А. Папкова, В.А. Бяднова, І.І. Сідзельнікава, М.С. Макушкіна, М.С. Шаніна, Л. С. Шанінай-Трэмбачэўскай працягваюць вызнаваць у мастацкай форме любоў да роднай зямлі, ідэі маральнасці і нацыянальнай духоўнасці, творча пераасэнсоўваюць гісторыю і культуру мардоўскага народа. Дзякуючы дзейнасці сучасных аўтараў выяўленчае мастацтва рэгіёна не губляе свае асаблівасці і індывідуальны вобраз, і ўяўляе сабой самастойную з’яву ў агульным кантэксце расійскай культуры.
Выстава “Выяўленчае мастацтва Мардовіі” будзе экспанавацца з 28 жніўня па 29 верасня 2024 г. у выставачным корпусе музея (вул. Карла Маркса, 24, 3-ці паверх).
Куратары выставы – Запека Кацярына Генадзьеўна, старшы навуковы супрацоўнік выставачнага аддзела Нацыянальнага мастацкага музея Рэспублікі Беларусь і Кузняцова Ганна Уладзіміраўна, старшы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь.
