Іван Восіпавіч Ахрэмчык атрымаў прафесійную адукацыю ў Вышэйшых мастацка-тэхнічных майстэрнях (ВМАТЭМАЙС) у г. Маскве, дзе вучыўся ў вядомых дзеячаў мастацтваў – Абрама Яхімавіча Архіпава, Канстанціна Мікалаевіча Істоміна, Аляксандра Васільевіча Шаўчэнкі. Пасля заканчэння ВМАТЭМАЙСа ў 1930 г. мастак вярнуўся ў Беларусь і ў 1931 г. пачаў выкладчыцкую дзейнасць, якая доўжылася на працягу ўсяго яго жыцця. У розныя гады ён выкладаў у Віцебскім мастацкім тэхнікуме (1931–1941), Мінскім мастацкім вучылішчы (1948–1952) (цяпер – Мінскі дзяржаўны мастацкі каледж імя А. К. Глебава), у Беларускім політэхнічным інстытуце (1953–1963) (цяпер– Беларускі нацыянальны тэхнічны ўніверсітэт), а пасля і ў Беларускім дзяржаўным тэатральна-мастацкім інстытуце (1963–1971) (цяпер – Беларуская дзяржаўная акадэмія мастацтваў).
Мастак працаваў у тэхніцы алейнага жывапісу ў многіх жанрах станковай карціны: партрэт, пейзаж, нацюрморт, буйнафарматныя работы на гістарычную тэму, ствараў таксама і манументальныя палотны. Іван Ахрэмчык з’яўляецца аўтарам адной з самых вядомых і значных работ на ваенную тэматыку “Абаронцы Брэсцкай крэпасці” (1957), якая ўваходзіць у пастаянную экспазіцыю музея.
На працягу ўсяго творчага шляху Івана Восіпавіча самымі ўпадабанымі жанрамі былі партрэт і пейзаж. Для партрэтаў пэндзля Івана Ахрэмчыка характэрна перадача ўнутранага эмацыйнага стану партрэтаванага, глыбіня яго характару. У пейзажах адлюстравана лірычная прыгажосць беларускай прыроды. У лясах і парках, палях і рэках можна ўбачыць чысціню колеру, вострае адлюстраванне нюансаў тону. Палітра мастака складаная па задуме, утрымлівае мноства градацый, з дапамогай якіх раскрываецца аўтарскае бачанне прыгажосці ў штодзённым. Паездка ў Манголію (1959) – вынік стварэння цыкла работ мангольскіх пейзажаў, дзе адлюстравана прыгажосць стэпаў і пустыняў.
На выставе прадстаўлены работы з фондаў Нацыянальнага мастацкага музея Рэспублікі Беларусь, матэрыялы і фотаздымкі з Беларускага дзяржаўнага архіва-музея літаратуры і мастацтва.
Выстава будзе працаваць да 21 студзеня 2024 года.
Куратар выставы – Паліна Гарашчэня, малодшы навуковы супрацоўнік навукова-фондавага аддзела Нацыянальнага мастацкага музея Рэспублікі Беларусь.
