На выставе, змешчанай у прасторы пастаяннай экспазіцыі старажытнабеларускага мастацтва, паказаны дзве манументальныя алтарныя скульптуры, якія трапілі ў збор Мастацкага музея ў выніку навуковай экспедыцыі 1969 г. з г. Слоніма.
Прадстаўленыя да агляду скульптуры з’яўляюцца парнымі, выкананы напрыканцы XVIII ст. і выяўляюць двух святых біскупаў. Адзін з іх, св. Амброзій, – раннехрысціянскі святы, арцыбіскуп Медыяланскі (сучасны Мілан), які жыў у IV ст., уваходзіць у лік Дактароў – Айцоў Рымска-каталіцкага касцёла. Вызначальным атрыбутам з’яўляецца вулей у правай руцэ святога. Згодна з легендай, пасля нараджэння Амброзія акружыў рой пчол, якія ўкладалі ў рот немаўля мёд, а пасля адляцелі, не зрабіўшы аніякай шкоды дзіцяці. Гэты эпізод сімвалічна сведчыць пра тое, што cв. Амброзій быў выбітным прамоўцам, а Слова Божае ў яго вуснах было падобна мёду. Традыцыйна cв. Амброзій Медыяланскі шануецца як патрон пчалярства.
Другі святы – найверагодней, cв. Войцех, які належыць да ліку найбольш шанаваных у Рэчы Паспалітай. Св. Войцех (cв. Адальберт) быў пражскім біскупам. Яго рэліквіі пасля пакутніцкай смерці ў Прусіі ў 997 годзе былі выкуплены польскім каралём Баляславам Храбрым і змешчаны ў касцёле ў г. Гнезна (Польшча), цэнтры, заснаваным тым жа манархам Гнезненскай архідыяцэзіі.
Рэстаўрацыя скульптуры cв. Амброзія адбылася ў сувязі з падрыхтоўкай выставы “Беларуская скульптура XVII–XVIII стст.”, якая праходзіла ў Нацыянальным мастацкім музеі Рэспублікі Беларусь у 2024 г. Рэстаўрацыя скульптуры другога біскупа – верагодна, cв. Войцеха – завершана ў 2025 г. Мастак-рэстаўратар – Вольга Разумава.
Выстава будзе працаваць да 2 сакавіка 2026 года.
Куратар выставы – Чавус Станіслаў Эдуардавіч, вядучы навуковы супрацоўнік аддзела старажытнабеларускага мастацтва Нацыянальнага мастацкага музея Рэспублікі Беларусь
