Выставачны праект адкрывае гледачу магчымасць прасачыць змену мастацкага светапогляду на працягу творчага шляху аўтара. У экспазіцыю ўвайшло каля 30 жывапісных работ мастака, створаных у перыяд 1960–1980-х гг. з фондаў Нацыянальнага мастацкага музея Рэспублікі Беларусь, калекцыі Беларускага саюза мастакоў і збору сям’і майстра. Жанравы дыяпазон твораў ахоплівае пейзаж, партрэт, сюжэтна-тэматычную карціну. Разнастайнасць жанраў, у якіх працаваў аўтар, уключае шырокае кола тэм: ад чалавека, які стварае матэрыяльныя і духоўныя даброты да шчаслівага бесклапотнага дзяцінства і велічнай прыгажосці прыроды. Творам Аляксандра Семілетава ўласцівы і манументальнае гучанне, якое адлюстроўвае канстанту савецкай эпохі, і экспрэсіўны змест, які дэманструе ўвагу да лёсу чалавека, яго ўзаемасувязь са светам.
Найбольш шырока на выставе прадстаўлены краявіды, створаныя майстрам у позні перыяд яго творчасці, калі ён адкрыў для сябе цудоўную прыроду жыткавіцкага Палесся. Велічныя дубы, рака Прыпяць з прытокам Скрыпіцы, якая залівае вясной вялікія лугі, унікальная і разнастайная мясцовая фауна зачароўвалі мастака і прымушалі вяртацца туды зноў і зноў. Разам з сынам Барысам ён ездзіў на паляванне, аднак трапяткое стаўленне да прыроды падахвочвала мастака адкласці стрэльбу і ўзяцца за эцюднік, які заўсёды быў пры ім. Краявіды, створаныя ў майстэрні на аснове эцюдаў, прывезеных з Палесся, адрозніваюцца трансфармацыяй мастацкага погляду: у іх з’яўляюцца абагульненасць формы, каларыстычная экспрэсія, утоенае драматычнае напружанне ў спалучэнні з глыбокай сузіральнасцю.
Галоўным акцэнтам выставы сталі аўтапартрэты Барыса і Івана Семілетавых – жывы сімвал пераемнасці і сувязі пакаленняў. Сёння работы гэтых мастакоў з іх вядомым індывідуальным почыркам адзначаны прафесійнымі ўзнагародамі і вядомы далёка за межамі краіны. Вытокам жа гэтай яркай дынастыі стаў Аляксандр Фёдаравіч: яго асоба і майстэрства далі сям’і той самы галоўны імпульс, які вызначыў іх агульны жыццёвы і творчы шлях
Куратары выставы – Аляксандра Чэчат і Анастасія Мянькоўская, малодшыя навуковыя супрацоўнікі аддзела беларускага мастацтва XX–XXI ст.
Выстава працягнецца па 18 жніўня 2026 года ў галоўным корпусе, пераходнай галерэі (вул. Ленина, 20)
