У экспазіцыі прадстаўлены работы найлепшых беларускіх графікаў другой паловы XX стагоддзя, якія працавалі з майстрам. Гэты праект – даніна памяці чалавеку, які прысвяціў сваё жыццё мастацтву, гісторыя яго шчырай любові да людзей і сваёй справы.
Дзмітрый Васільевіч Малаткоў – унікальны спецыяліст, які пакінуў шырокую і неацэнную спадчыну. У розных калекцыях музея беражліва захоўваецца каля 4000 гравюр і літаграфій, надрукаваных рукамі майстра для мастакоў з Беларусі, Расіі, Літвы, Польшчы, Германіі і іншых краін.
Спецыялісты Нацыянальнага мастацкага музея Рэспублікі Беларусь ведаюць Дзмітрыя Васільевіча не толькі як прафесіянала, які пакінуў значны след у гісторыі беларускага мастацтва, але і як калекцыянера і шчодрага дароўцу. З 1960-х гадоў майстар не толькі друкаваў творы мастакоў, але і збіраў эстампы. Свае калекцыі ён неаднаразова перадаваў у музей. Агульны лік музейных прадметаў, атрыманых у дар ад Зміцера Малаткова, сёння перавышае 1000 (!) адзінак захоўвання. Гэта адзін з найбуйнейшых збораў у гісторыі музея, прынятых у дар ад прыватнай асобы. Таксама яно ўнікальнае ў тым, што дарыльшчык прымаў непасрэдны ўдзел у стварэнні большай часткі твораў.
Выстава дае гледачу цудоўную магчымасць пазнаёміцца з асобай Дзмітрыя Малаткова, нашага сучасніка і непаўторнага майстра, адкрыць новую старонку нацыянальнага мастацтва, убачыць і атрымаць асалоду ад прыгажосці і культуры выканання прафесійнага эстампа.
Выстава працуе па 11 студзеня 2026 года.
