Адольф Самуілавіч Гугель (1915 – 1999) – шматгранны мастак і Заслужаны дзеяч мастацтваў БССР, які праявіў сябе ў самых разнастайных жанрах: партрэта, нацюрморта і пейзажа, сюжэтна-тэматычных карцін. Атрымаўшы прафесійную адукацыю ў Віцебскім мастацкім тэхнікуме (1936–1940), перад Вялікай Айчыннай вайной мастак не паспеў у поўнай меры праявіць свой творчы патэнцыял. Уступіўшы дабравольцам у рады Чырвонай Арміі, Адольф Гугель неўзабаве быў камісаваны з-за перанесенай цяжкай хваробы і адпраўлены ў эвакуацыю ў горад Кемерава, дзе застанецца да заканчэння вайны. Пасля вяртання ў Мінск у 1945 годзе імя мастака ўсё часцей можна было пачуць на выставах рознага маштабу.
Жывапіс Адольфа Гугеля прыпаў на пасляваенны савецкі час і стаў камертонам сваёй эпохі. Творы мастака паказваюць яго як цудоўнага майстра кампазіцыі з асаблівым адчуваннем часу. Сярод герояў палотнаў можна сустрэць як звычайных савецкіх грамадзян, так і вядомых культурных і палітычных дзеячаў, але асаблівае месца займаюць лірычныя дзіцячыя вобразы. Беларуская прырода стала крыніцай натхнення для многіх палотнаў Гугеля, у якіх ён, як сапраўдны даследчык, вывучае, раскрывае і эксперыментуе са сваімі творчымі здольнасцямі, ствараючы “праніклівыя краявіды”.
Адольф Самуілавіч пачаў свой творчы шлях як мастак з рэалістычным падыходам у жывапісе, які імкнецца да творчасці мастакоў-перадзвіжнікаў, але паступова можна прасачыць змену на вядомы і характэрны аўтарскі почырк, якому ўласцівая іншая, пластычная вобразная мова пісьма, якая сыходзіць у бок дэкаратыўнасці і ўмоўнасці.
Экспазіцыя прадстаўлена творамі з фондаў Нацыянальнага мастацкага музея Рэспублікі Беларусь, Музея Беларускага Палесся, Беларускага саюза мастакоў, а таксама дакументамі і фотаздымкамі з Беларускага дзяржаўнага музея гісторыі Вялікай Айчыннай вайны і сям'і мастака.
Выстава «Адольф Гугель. Аповесць, напісаная фарбамі» будзе экспанавацца ў зале выставачнага корпуса Нацыянальнага мастацкага музея Рэспублікі Беларусь з 25 красавіка па 15 чэрвеня 2025 года.
