29 кастрычніка ў Нацыянальным мастацкім музеі пачала працавать выстава “Аркадзь Астаповіч. Да 125-годдзя з дня нараджэння”. Мы паказваем як эталонныя працы мастака, так і графічныя аркушы, што рэдка экспануюцца і былі створаны майстрам з 1915-га па 1940-ы год.
Творы Астаповіча складаюць “залаты фонд” беларускай графікі 1920–1930-х гадоў. Дзіўна, што захавалася такая колькасць прац, створаных у міжваенны перыяд. Толькі ў нашых фондах іх больш за дзвесце!
Экспазіцыя пабудавана так, каб глядач убачыў увесь шлях тонкай і ўзнёслай душы мастака, якая вырывалася за межы вуглоў і простых ліній. Падкрэсленую ўвагу да раслінных матываў, узорнасць і сілуэтнасць малюнка, арнаментальную трансфармацыю натуры і гульню кантрастаў адзначаюць лепшыя працы Астаповіча пачатку 1920-х – сярэдзіны 1930-х гадоў.
