Ураджэнец найстаражытнага горада Ніжняга Паволжа – Астрахані, бліскучы выпускнік і пенсіянер Пецярбургскай Акадэміі мастацтваў, акадэмік жывапісу, член найбуйнейшых выставачных аб’яднанняў XX стагоддзя, такіх як “Саюз рускіх мастакоў”, “Свет мастацтва”, Асацыяцыя мастакоў рэвалюцыйнай Расіі, удзельнік шматлікіх выстаў за яе межамі, Барыс Міхайлавіч Кустодзіеў увайшоў у гісторыю рускага мастацтва, перш за ўсё, як цудоўны бытапісец правінцыйна-купецкай Расіі, выдатны майстар партрэта, тонкі графік, таленавіты скульптар і тэатральны мастак.
Экспазіцыю гэтай выставы складае калекцыя твораў мастака са збору Нацыянальнага мастацкага музея Рэспублікі Беларусь, Віцебскага абласнога краязнаўчага музея, кнігі, ілюстраваныя майстрам, з фонду Нацыянальнай бібліятэкі Беларусі, а таксама фатаграфіі з сямейнага альбома Кустодзіевых, які знаходзіцца ў зборы Астраханскай карціннай галерэі імя П. М. Дагадзіна. У пачатку XX стагоддзя Б. М. Кустодзіеў сур’ёзна захапляўся фатаграфіяй і пакінуў шэраг здымкаў, якія адносяцца да 1902–1906 гадоў і адлюстроўваюць сям’ю і блізкіх мастака, іх жыццё ў маёнтку Паўлаўскае, будаўніцтва дома-майстэрні “Церамы”.
Выстава раскрывае ўніверсалізм таленту Б. М. Кустодзіева і знаёміць гледача з непаўторнай мастацкай індывідуальнасцю выдатнага майстра, чыя шматгранная і яркая творчасць, прасякнутая радасцю быцця, аптымізмам і гуманізмам, –унікальная і цікавая з’ява ў рускім мастацтве.
Куратар выставы – Ала Васілеўская, вядучы навуковы супрацоўнік навукова-фондавага аддзела Нацыянальнага мастацкага музея Рэспублікі Беларусь.
Выстава будзе працаваць да 21 мая 2023 года
