19 сакавіка а 14-й гадзіне адбудзецца лекцыя “Этнаметафізіка і сфера сакральнага ў беларускай традыцыйнай культуры”.
Этнафіласофія і беларускія культурныя коды.
Цыкл гутарак пра беларускую традыцыйную карціну свету, пра яе ўнутраныя сэнсы і сувязі і пра новую навуку – этнафіласофію, якая яе даследуе, (рэ)канструюе і інтэрпрэтуе.
Гутарка трэцяя
У беларускім традыцыйным светамысленні вытокі бачнага свету, чалавека, сэнсаў і норм чалавечага існавання знаходзяцца ў сферы сакральнага. Сакральныя канцэпты, вобразы, сімвалы і феномены – тое, чаму ў калектыўнай свядомасці надаецца статус святасці, – выклікаюць неаспрэчную павагу, а часта і пачуццё духоўнага ўздыму ці страху.
Аддзеленая ад прафаннага, будзённага сакральнасць тым не менш прысутная ва ўсіх аспектах быцця, у прыродных з’явах, у працоўным календары, у таямніцы жыцця і смерці, у прычынна-выніковых сувязях…
Уяўленні пра сакральную прастору і час, сакральную гісторыю, сакральныя рэчы, з’явы і аб’екты, а таксама сакральныя адносіны і паводзіны рэгламентуюць жыццё традыцыйнай супольнасці.
Асноўнай персаніфікацыяй сакральнасці выступае Бог – комплексны канцэпт, што працінае ўсю рэчаіснасць, адначасова імманентны і трансцэндэнтны ёй. Распазнаванне сакральнага і належнае да яго стаўленне ствараюць глыбінную неўсвядомленую аснову ідэнтычнасці самой супольнасці і прыналежнасці да яе.
Лекцыю чытае Ірына Дубянецкая – старшы навуковы супрацоўнік Інстытута філасофіі НАН Беларусі.
Папярэдняя рэгістрацыя не патрабуецца.
Наведванне лекцыі па ўваходным білеце ў галоўны корпус музея.
