Міхась Сеўрук (1905–1979) – беларускі мастак, жывапісец, графік, аўтар жанравых кампазіцый, партрэтаў і пейзажаў. Аднак больш за ўсё ён вядомы як мастак, які шмат працаваў з тэмай беларускага сялянскага жыцця, якую ён трактуе ў ідылічным ключы, змяшчаючы ў кампазіцыйныя і каляровыя формулы эпохі Рэнесансу. Нягледзячы на тое, што гістарычныя перыпетыі падзялілі яго творчасць на два перыяды – віленскі і нясвіжскі – гэтая арыентацыя на класічнае мастацтва захавалася. Міхась Сеўрук ідэалізуе сялянскае жыццё, якое паўстае як трансфармаваны міф пра Аркадзію, якая працягвае існаваць у непахіснасці і традыцыйнасці беларускага сялянскага свету.
Упершыню за апошнія 45 гадоў будзе прадстаўлена панарама работ Міхася Сеўрука, якая ахоплівае ўсе перыяды яго творчасці. Выстава прадставіць новыя навуковыя адкрыцці ў галіне вывучэння творчасці і біяграфіі мастака, а таксама новыя атрыбуцыі яго твораў.
У экспазіцыі будзе прадстаўлена больш за 120 твораў жывапісу і графікі з калекцыі Нацыянальнага мастацкага музея Рэспублікі Беларусь, Нясвіжскага гісторыка-краязнаўчага музея, фонда Беларускага саюза мастакоў і прыватных калекцый, а таксама вялікая колькасць рэдкіх архіўных фотаздымкаў з Беларускага дзяржаўнага архіва-музея літаратуры і мастацтва і Нясвіжскага гісторыка-краязнаўчага музея.
Выстава працягнецца па 14 студзеня 2026 года.
Куратар – Юлія Лісай, вядучы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь, магістр мастацтвазнаўства
