У 2020 годзе адзначаецца памятная дата – 150 гадоў з дня нараджэння Фердынанда Рушчыца (1870–1936). Выбітны пейзажыст, графік, тэатральны дэкаратар і педагог, Рушчыц пакінуў глыбокі след у мастацтве і культурна-грамадскім жыцці былой Рэчы Паспалітай. Фердынанд Рушчыц – яркі прадстаўнік сімвалізму ў мастацтве, які злучыў традыцыі нацыянальнага жывапісу і заходнееўрапейскіх тэндэнцый, ключавая фігура мастацкага жыцця Віленшчыны ў міжваенны перыяд. Ён стаў важнай персонай для культуры сучасных Беларусі, Літвы і Польшчы. Палотны мастака захоўваюцца ў музеях вышэйпералічаных краін, а таксама еўрапейскіх і амерыканскіх музейных і прыватных зборах.
Імя Фердынанда Рушчыца ўнесена ЮНЕСКА ў каляндар памятных дат на 2020 год. Урачыстае адкрыццё Года Рушчыца адбылося 27 лютага ў Нацыянальным мастацкім музеі Рэспублікі Беларусь. Выстава, якая адкрыецца, – галоўнае мерапрыемства з цэлага шэрага падзей, запланаваных да святкавання Года Рушчыца ў Беларусі. Яе мэта прадставіць шырокі мастацкі кантэкст, у якім існавала творчасць мастака. У экспазіцыі будуць прадстаўлены не толькі карціны Фердынанда Рушчыца, але і працы мастакоў яго асяроддзя. Гэта і творы настаўнікаў Рушчыца ў Акадэміі мастацтваў – Івана Шышкіна і Архіпа Куінджы, яго аднакурснікаў па майстэрні Куінджы – Мікалая Рэрыха, Канстанціна Багаеўскага, Вільгельма Пурвітыса, Аркадзя Рылова і інш. Цэлы раздзел выставы будзе прысвечаны вучням Фердынанда Рушчыца, выпускнікам Віленскага ўніверсітэта, выдатным беларускім мастакам Пётры Сергіевічу і Міхасю Сеўруку.
Выставу дапоўняць творы сучасных мастакоў, удзельнікаў пленэраў, прысвечаных майстру, а таксама найцікавы архіў фатаграфій вёскі Багданава, дзе знаходзіўся маёнтак Рушчыцаў, выкананых падчас Першай сусветнай вайны (з калекцыі Уладзіміра Багданава).
Да нядаўняга часу ў зборы нашага музея захоўвалася толькі адна праца Фердынанда Рушчыца “Ля касцёла” 1899 года, набытая ў 1957 годзе ў ленінградскага калекцыянера А. І. Шустэра. У лістападзе 2019 г. пры фінансавай падтрымцы ганаровага консула Беларусі ў Лазане Андрэя Нажэскіна былі набыты ў калекцыі ўнука мастака Фердынанда Рушчыца і перададзены ў дар яшчэ тры жывапісныя работы, што адносяцца да ранняга перыяду творчасці майстра.
