Свята афіцыйна было ўстаноўлена ў 1917 годзе. На працягу шмат гадоў падзея адзначалася як Дзень міжнароднай салідарнасці працоўных усіх краін. Традыцыя святкавання Дня вясны і працы захавалася ў Беларусі і сёння. З 1998 года, згодна з указам Прэзідэнта Рэспублікі Беларусь, Дзень міжнароднай салідарнасці працоўных быў перайменаваны ў Свята працы. У гэты дзень ушаноўваюць працаўнікоў усіх сфер, якія дасягнулі высокіх паказчыкаў у рабоце.
На палатне “Выпрабаванне “МАЗаў” беларускі мастак-жывапісец Л.М. Асядоўскі паказвае рабочых аднаго з самых вядомых на тэрыторыі савецкай і постсавецкай прасторы аўтамабілебудаўнічых заводаў, якія жвава і па-сяброўску абмяркоўваюць станоўчы вынік выпрабавання новых мадэляў аўтамабіля. Мінскі аўтамабільны завод і сёння з’яўляецца адным з лідараў па выпуску вялікагрузнай аўтамабільнай, а таксама аўтобуснай, тралейбуснай і прычапной тэхнікі.
