У экспазіцыі будуць прадстаўлены жывапісныя і графічныя творы магілёўскага мастака, якія ён прысвяціў тэме малой радзімы.
Разважанні пра малую радзіму ёсць у жыцці кожнага чалавека, які пакінуў мясціны свайго дзяцінства. Як бы ні складалася жыццё такіх людзей у вялікім свеце, у іх ёсць дом, ёсць малая радзіма, дзе яны заўсёды знаходзяць супакаенне і адчуваюць нябачную падтрымку сваёй зямлі.
Для жыхароў горада – гэта родны горад і вуліца ў ім, для вяскоўцаў – сяло, вёска, невялікі дворык, дзе прайшлі бесклапотныя дзіцячыя гады. Куток прыроды, які цешыў вока і дарыў пачуццё суцяшэння і спакою, пуня, калгасны сад, цэркаўка, чоўны на беразе, сцены старога замка.
З часам з'яўляецца жаданне не толькі захаваць памяць аб гэтых месцах у сваім сэрцы, але яшчэ і зрабіць для роднага краю нешта патрэбнае і слушнае, дапамагчы яму прыгожымі, бескарыслівымі справамі.
У сваіх працах мастак звяртае ўвагу гледача на культурную спадчыну краіны і важнасць яе захавання.
