21 жніўня ў Нацыянальным мастацкім музеі Рэспублікі Беларусь пачне працу часовая экспазіцыя “Іван Фяцісаў. Маляўнічыя навелы”, прымеркаваная да 105-годдзя з дня нараджэння мастака, педагога, заслужанага дзеяча культуры БССР, удзельніка Вялікай Айчыннай вайны Івана Якаўлевіча Фяцісава.
У экспазіцыю ўвойдзе каля 30 жывапісных работ мастака са збору Нацыянальнага мастацкага музея Рэспублікі Беларусь, Брэсцкага абласнога краязнаўчага музея, калекцыі сям'і майстра, створаных у перыяд 1950–1990-х гг. Таксама будуць прадстаўлены асабістыя рэчы Івана Якаўлевіча Фяцісава, пісьма і фатаграфіі з сямейнага архіва. Жанравы дыяпазон твораў ахоплівае партрэт, пейзаж, сюжэтна-тэматычную карціну. Творчасць жывапісца займае асаблівае месца ў беларускім жывапісе другой паловы XX стагоддзя дзякуючы спалучэнню рэалістычнай традыцыі і тонкага псіхалагізму.
Цэнтральнай тэмай Фяцісава-мастака становіцца чалавек як носьбіт складанага ўнутранага перажывання. Выкарыстоўваючы камерную кампазіцыю, прыглушаны каларыт ці, наадварот, насычаныя каляровыя кантрасты, майстар стварае псіхалагічна пераканаўчыя вобразы, у якіх знешняя стрыманасць спалучаецца з глыбокім эмацыйным зместам.
Часовая экспазіцыя будзе працаваць па 4 кастрычніка.
Урачыстае адкрыццё выставы адбудзецца 28 жніўня ў 15:00 у сяродкрыжжы.
