Марыя Ісаёнак – яркая фігура беларускага выяўленчага мастацтва. Вялікі масіў яе твораў паходзіць з майстэрні. Практычна на кожнай карціне вы бачыце інтэр’ер гэтай прасторы – прасторы творчасці, самоты, пошуку і поспеху. Майстэрняй мастачцы служылі розныя лакацыі. Доўгія гады адным з такіх месцаў быў дом у вёсцы Чарневічы ў Мінскай вобласці, дзе яна праводзіла лета і восень, вяртаючыся на зімовы і вясновы перыяды ў Мінск. Цяпер такім месцам з’яўляецца дом-студыя ў аграгарадку Калодзішчы Мінскай вобласці.
Марыя Ісаёнак увайшла ў беларускае мастацтва ў часы панавання “суровага стылю” і на яго фоне здолела прыцягнуць увагу да сваіх карцін – ціхіх і праніклівых. Мастачка малюе нацюрморты, сюжэтныя кампазіцыі, пейзажы з натуры, пры натуральным асвятленні, залітыя сонечным святлом, узнаўляе атмасферу пагодных умоў, ствараючы адчуванне фізічнай прысутнасці святла. Сонечнае святло ў карцінах аўтара з’яўляецца эмацыянальным маркерам, які падкрэслівае моманты гармоніі і крохкасці свету, дапамагае адлюстраваць жывую карціну прыроды, надаючы ёй асаблівы, узнёслы, нават летуценны настрой. Прыроджаная ўважлівасць дазваляе мастачцы мімалётнае, нават простае, штодзённае паказаць ва ўсёй красе і перадаць адчуванне ўбачанага моманту.
На выставе прадстаўлены работы, створаныя з 1990 па 2026 год, з майстэрні мастачкі Марыі Ісаёнак, частка з якіх экспануецца ўпершыню.
Выстава працуе да 13 красавіка 2026 года.
Марыя Іванаўна Ісаёнак (нар. 25.10.1949, в. Кісялі, Гарадоцкі р-н, Віцебская вобл.).
У 1965–1969 вучылася ў Мінскім мастацкім вучылішчы на
жывапісна-педагагічным аддзяленні ў Міхаіла Якаўлевіча Лісоўскага і Трафіма Дзмітрыевіча Ігнаценкі.
У 1969–1971 працавала па размеркаванні настаўніцай малюнка і чарчэння, выхавацелем у Даўгапольскай школе-інтэрнаце Віцебскай вобласці. У 1971 выйшла замуж за Мікалая Ісаёнка.
У 1974 пераехала ў Мінск. У 1974–1976 працавала мастаком-дэкаратарам на кінастудыі “Беларусьфільм”.
З 1976 удзельнічае ў выставах. З 1986 – член Саюза мастакоў БССР (па рэкамендацыі народнага мастака БССР Леаніда Дзмітрыевіча Шчамялёва і заслужанага дзеяча мастацтваў БССР Васіля Фёдаравіча Сумарава).
У 2000 адбылася першая персанальная выстава ў Палацы мастацтваў у Мінску. У 2005 упершыню выставілася ў Нацыянальным мастацкім музеі Рэспублікі Беларусь.
Творы знаходзяцца ў зборы Нацыянальнага мастацкага музея Рэспублікі Беларусь, Нацыянальнага цэнтра сучасных мастацтваў Рэспублікі Беларусь, Віцебскага абласнога мастацкага музея, у фондах Беларускага саюза мастакоў, Саюза мастакоў Расіі, у прыватных калекцыях.
