Рашэннем Міністэрства культуры калекцыі Нацыянальнага цэнтра сучасных мастацтваў перададзены Нацыянальнаму мастацкаму музею, а гэта больш за 6 тысяч твораў жывапісу графікі, скульптуры, дэкаратыўна-прыкладнога мастацтва, аўтарскай фатаграфіі, плаката.
Выстава знаёміць толькі з невялікай колькасцю твораў са збору, які фарміраваўся Нацыянальным цэнтрам сучасных мастацтваў і яго папярэднікамі – Дырэкцыяй мастацкіх выстаў, шматфункцыянальным выставачным комплексам «На ростанях», Музеем сучаснага выяўленчага мастацтва на працягу блізу 40 гадоў – з 1987-га па 2026 год. У экспазіцыі прадстаўлена звыш 40 работ 39-ці айчынных і замежных аўтараў, якія адлюстроўваюць мастацкую практыку дадзенага перыяду, з яе сэнсавымі і фармальнымі пошукамі.
Выказванні аўтараў у рамках традыцый рэалістычнай школы, філасофіі сюррэалізму, абстрактнага мастацтва выразна акрэслены ў работах Ігара Кашкурэвіча, Мацвея Басава, Георгія Скрыпнічэнкі, Аляксандра Салаўёва, яны дазваляюць прасачыць актуальныя для свайго часу тэндэнцыі сусветнага выяўленчага мастацтва. Перыяд з'яўлення першых творчых суполак праілюстраваны творамі ўдзельнікаў групы «Няміга-17» Анатоля Кузняцова, Сяргея Кірушчанкі, Зоі Літвінавай, Тамары Сакаловай. Тэхнічныя навіны, якія ствараюць умовы для развіцця мастацтва фатаграфіі, знайшлі адлюстраванне ў работах Ігара Саўчанкі, Вадзіма Качана, Віктара Жураўкова.
Значную частку экспазіцыі складаюць творы, перададзеныя ў дар: гэта жывапісныя палотны Аляксандра Родзіна, Людмілы Тардоф-Кальмаевай, Сяргея Цімохава, Міхаіла Рагалевіча. Замежнае мастацтва прадстаўлена работамі Дзмітрыя Лаўрэнцьева і Андрыуса Янулайціса (Латвія), Германа Бусса (Германія), Ганны Канфер (Расія), мастацтва маладых аўтараў – жывапіснымі палотнамі 2025 года, створанымі ў рамках пленэра, прысвечанага 80-годдзю Вялікай Перамогі.
