Жыгімонт Святлана Вадзімаўна (1968 г.н.) – беларускі мастак-жывапісец. Нарадзілася ў г. Мінску. Вучылася ў мастацкай студыі Рышарда Мая (1981–1983 гг.), Мінскім мастацкім вучылішчы імя А.К. Глебава (1984–1988 гг.). Брала ўрокі малюнка ў Леаніда Раманоўскага (1988–1990 гг.).
Аўтарскі праект “Калі пайду далінай смяротнага ценю” прымеркаваны да 80-годдзя Перамогі ў Вялікай Айчыннай вайне. У сваіх творах Святлана Жыгімонт паказвае людзей – лікі святых, герояў загінуўшых і жывых, зрынутых ворагаў. Сваю першую карціну гэтага праекта мастачка напісала ў 2016 годзе; карціна “Да немцаў не ідзі. Подзвігу Лізы Шмыровай прысвячаецца” была завершана перад адкрыццём выставы ў музеі. Святлана Жыгімонт у сваёй творчасці жыве момантам – піша тое, што баліць, або радуе тут і цяпер. Яна думае і адчувае кантрастна, імпульсіўна і глыбока адначасова. Так з’яўляюцца яе поўныя драматызму жывапісныя перажыванні рэлігійных пастулатаў і царкоўных калізій, грамадзянскіх падзей сучаснасці і многае іншае.
Кантактная асоба – Савінаў Аляксей Аляксандравіч, вучоны сакратар Нацыянальнага мастацкага музея Рэспублікі Беларусь.
