Лекцыя “Пра што кажуць кветкі? Разважанні пасля выставы”

Лекцыя “Пра што кажуць кветкі? Разважанні пасля выставы”

Нацыянальны мастацкі музей Рэспублікі Беларусь Галоўны корпус

13 лістапада (нядзеля) а 15-й гадзіне адбудзецца лекцыя “Пра што кажуць кветкі? Разважанні пасля выставы”.

Кветкам, захаваным у мастацтве, было даравана вечнае жыццё дзякуючы мастакам. Яшчэ егіпцяне малявалі свае лотасы, кітайцы вынайшлі стыль гохуа – “кветкі і птушкі”, японцы – мастацтва складання букетаў – ікебану, а сёння ў кожнай галерэі і музеі вы непазбежна знойдзеце некалькі нацюрмортаў. Кветкі прысутнічаюць усюды, яны імгненныя і бессмяротныя.

Кветкі былі сімваламі багоў, асколкамі раю на зямлі, аб’ектамі сузірання, напамінам пра непазбежнасць смерці, прадметамі, што казалі пра каханне, упрыгожваннем касцюма і прычоскі. Кветкі любімыя мастакамі і жанчынамі. Як складваюцца адносіны паміж мастацтвам людзей і светам раслін? Як яны ўплываюць на нас, а мы на іх? Пра іх разнастайныя функцыі ў мастацтве і пойдзе гаворка ў лекцыі.

Лекцыю чытае вядучы навуковы супрацоўнік Нацыянальнага мастацкага музея Надзея Усава.

Папярэдняя рэгістрацыя не патрабуецца. Наведаць лекцыю можна па ўваходным білеце ў галоўны корпус музея.