Абраз Маці Божай Жыровіцкай знаходзіцца ў Жыровіцкім Свята-Успенскім мужчынскім манастыры і шануецца як цудатворны праваслаўнай, уніяцкай і каталіцкай цэрквамі. Па паданні, яна з'явілася пастушкам у 1470 г., на грушы, каля маёнтка Жыровічы. Гэта адна з галоўных святыняў і рэліквій Беларусі. Абразок уяўляе сабой авал з яшмы памерам 5,7х4,1х0,8 см, на адным баку якога выразана рэльефная выява Маці Божай Замілаванне з Немаўляткам на правай руцэ. Хрыстос у кароткім хітоне прыціскаецца да Маці, яго галава некалькі адкінута назад і датыкаецца да нахіленай галавы Марыі. На гравюры Л. Тарасевіча, выкананай у 1682 г. па малюнку П. Бацэвіча, абраз Жыровіцкай Маці Божай раней быў устаўлены ў металічную акантоўку з надпісам: «Честнейшую Херувим и славнейшую без сравнения Серафим, без истления Бога Слова рождшую». Гэты надпіс прысутнічае на большасці копій Жыровіцкай святыні, як і на спісе з калекцыі Нацыянальнага мастацкага музея Рэспублікі Беларусь, які паходзіць з Турава Гомельскай вобласці.
Выява Маці Божай з Дзіцяткам размяшчаецца ў авале з вышэйназваным надпісам. Па кутах палатно дэкарыравана букецікамі кветак. У адрозненне ад пратографа, на публікуемым помніку галоўка Дзіцятка менш адхіленая назад і ножкі злучаныя разам. Таксама некалькі зменена становішча галавы і рук Маці Божай.
Выстаўка будзе працаваць да 31 мая 2025 года.
Куратар выстаўкі – Сысоева Любоў Львоўна, вядучы навуковы супрацоўнік аддзела старажытнабеларускага мастацтва Нацыянальнага мастацкага музея Рэспублікі Беларусь.
