У Нацыянальным мастацкім музеі Рэспублікі Беларусь у рамках святкавання Міжнароднага дня роднай мовы з 21 лютага па 6 сакавіка 2025 года пройдзе выстава адной карціны Заслужанага дзеяча мастацтваў БССР Дзмітрыя Іванавіча Алейніка (1929–2003) “Край белых буслоў” (1982).
Дзмітрый Іванавіч Алейнік – беларускі жывапісец, які атрымаў мастацкую адукацыю спачатку ў Мінскім мастацкім вучылішчы, а пазней у Беларускім тэатральна-мастацкім інстытуце, дзе вучыўся ў знакамітых беларускіх жывапісцаў Віталя Цвіркі і Валянціна Волкава. На працягу ўсяго творчага шляху Д.І. Алейніка асабліва прываблівала прыгажосць беларускай прыроды, таму ён неаднаразова ўвасабляў яе ў сваіх палотнах, пісаў краявіды з асаблівым замілаваннем і захапленнем, насычаючы іх яркімі кветкамі, раскрываючы багацце роднага краю.
Твор “Край белых буслоў” – адлюстраванне глыбокага пачуцця прыхільнасці да роднай зямлі, яе культуры і традыцый, мастацкае запрашэнне да разважання аб нашай спадчыне, беларускай мове, якая з’яўляецца сувязным звяном паміж пакаленнямі.
Куратар выставы – Мянькоўская Анастасія, малодшы навуковы супрацоўнік аддзела беларускага мастацтва ХХ-ХХІ стст. Нацыянальнага мастацкага музея Рэспублікі Беларусь.
