Пейзажны жанр, адзін з ключавых у беларускім жывапісе, з’яўляецца вольнай прасторай для эксперымента, спосабам філасофскага асэнсавання жыцця. Але сённяшняя выстава не імкнецца паглыбіць гледача ў разважанні аб прыродзе часу і прасторы. Пасярод гарадской мітусні, падманлівай пагоні за поспехам, віхру асабістых і сусветных праблем падчас хочацца удыхнуць свежага паветра, перанесціся хаця б на імгненне ў запаветныя куткі Беларусі, якія, нават калі ты там ніколі не быў, падсвядомасць пазнае як свае, родныя. Гэтыя краявіды цешаць вока і прымушаюць у думках перанесціся ў свет, дзе сонечныя фарбы спелых палёў суседствуюць з задумлівай паэтычнасцю прахалодных асенніх вечароў; а квітнеючыя дрэвы напамінаюць аб бясконцасці жыцця, магчымасці вырвацца з паўсядзённасці і надзеі на будучыню.
Прадстаўленыя на выставе творы Віталя Цвіркі, Івана Ахрэмчыка, Паўла Масленікава, Віктара Вярсоцкага, Віктара Грамыкі, Антона Бархаткова, Мікалая Бушчыка, Канстанціна Качана, Вячаслава Кубарава, Мікалая Ісаёнка, Пятра Данэліі і Дзмітрыя Алейніка запрашаюць з любоўю зірнуць на маляўнічыя краявіды Беларусі, адчуць цэлы спектр настрояў, нязменным у якім застаецца адно – пачуццё адзінства з роднай зямлёй.
Выстава будзе працаваць па 29 верасня 2025 года.
Куратар выставы: Дарына Зуева, малодшы навуковы супрацоўнік выставачнага аддзела Нацыянальнага мастацкага музея Рэспублікі Беларусь.
