У экспазіцыі прадстаўлена больш за 30 твораў жывапісу і графікі, створаных мужам і жонкай Юрыем і Вольгай Крупянковымі. Нягледзячы на тое, што мастакі працуюць у розных тэхніках і жанрах, іх творчая манера мае шмат агульнага: пазітыўнае стаўленне да свету, жаданне бачыць радасць і казачнасць у звычайных рэчах, адчуванне свята. Шмат увагі мастакі надаюць перадачы чалавечых пачуццяў, цеплыні сямейных адносін, імкнуцца ўбачыць гармонію і прыгажосць жыцця. Творцы не баяцца складаных шматфігурных кампазіцый, імкнуцца дасягаць у сваіх работах максімальнай выразнасці. Дбайная прадуманасць і дакладнасць дэталяў у палотнах Юрыя пераклікаецца з вытанчанасцю і выразнасцю насычаных графічных лістоў Вольгі. Мастакі адкрываюць гледачу дарогу ў свой свет, адначасова рэальны і казачны, напоўнены цяплом і любоўю.
І графіка Вольгі, і жывапіс Юрыя ствараюць адчуванне кранальнага пазнавання таго самага горада, той самай музыкі і тых самых казак, якія мы так любім. Гэтыя адчуванні глядач абсалютна ясна ўлоўлівае, таму што цеплыня, пяшчота і бясконцая любоў да вуліц, што пазнаюцца, і казак былі суаўтарамі мастакоў пры стварэнні гэтых твораў.
Выстава будзе працаваць па 1 лютага 2026 года.
