Канферэнцыя адбудзецца 21 мая 2026 года па адрасе: г. Мінск, вул. Леніна, 20.
У рамках форуму плануецца абмеркаванне ў навуковым фармаце актуальных пытанняў мастацтвазнаўства, музеязнаўства, рэстаўрацыйнай справы, а таксама абмен прафесійным вопытам у сферы вывучэння, захавання і інтэрпрэтацыі мастацкай спадчыны.
Праблемнае поле канферэнцыі:
- Музей і яго збор: праблемы фарміравання, вывучэння і інтэрпрэтацыі калекцый.
- Роля М.П. Міхалапа ў арганізацыі збіральніцкай і навуковай дзейнасці Дзяржаўнай карціннай галерэі БССР.
- Мастацкая спадчына М.П. Міхалапа.
- Актуальныя пытанні пошуку і рэстытуцыі культурных каштоўнасцей.
- Атрыбуцыя і навуковыя даследаванні твораў мастацтва з музейных калекцый.
- Сучаснае выяўленчае мастацтва: тэндэнцыі, кантэксты, інтэрпрэтацыі.
- Практычны вопыт і гістарычная перспектыва рэстаўрацыі музейных прадметаў.
- Сучасныя магчымасці музейнай камунікацыі.
- Тэорыя і практыка музейнага менеджменту і маркетынгу.
- Музейная педагогіка праз прызму сучасных методык і тэхналогій.
- Музей як інклюзіўная культурная прастора.
Да ўдзелу запрашаюцца мастацтвазнаўцы, спецыялісты ў галіне музейнай справы, рэстаўратары, гісторыкі, культуролагі, а таксама прадстаўнікі сумежных дысцыплін, чые навуковыя інтарэсы суадносяцца з навуковым полем канферэнцыі.
- Рэгламент канферэнцыі: пленарны даклад – да 20 хв., секцыйны – да 15 хв., выступленні і паведамленні ў дыскусіях – да 5 хв.
- Мовы канферэнцыі: беларуская, руская.
- Форма ўдзелу: вочная.
Удзел у канферэнцыі бясплатны, рэгістрацыйны ўнёсак не прадугледжаны. Праезд, пражыванне, харчаванне – за кошт удзельнікаў канферэнцыі.
Афіцыйнае персанальнае запрашэнне на канферэнцыю для афармлення камандзіроўкі дасылаецца па запыце.
Заяўку на ўдзел (па прыкладаемай форме) з пазнакай «Аладаўскія чытанні» неабходна даслаць на адрас электроннай пошты conference@artmuseum.by не пазней за 26 красавіка 2026 г.
Атрыманне заяўкі па электроннай пошце будзе пацверджана аргкамітэтам. У выпадку адсутнасці зваротнага ліста з паведамленнем аб прыняцці заяўкі да разгляду на працягу тыдня просім прадубліраваць заяўку на электронны адрас: conference@artmuseum.by.
Па выніках работы канферэнцыі плануецца выданне зборніка навуковых артыкулаў. Тэкст даклада прадастаўляецца па электроннай пошце conference@artmuseum.by не пазней за 21 чэрвеня 2026 г. Публікацыя адабраных матэрыялаў бясплатная. Тэкст артыкула павінен быць добра вывераны, набраны ў адпаведнасці з указанымі патрабаваннямі.
Аргкамітэт пакідае за сабой права адбору матэрыялаў для публікацыі ў зборніку, а таксама іх рэдагавання. У зборнік уключаюцца арыгінальныя, раней неапублікаваныя артыкулы. Дасланыя матэрыялы не рэцэнзуюцца і не вяртаюцца.
Патрабаванні да афармлення матэрыялаў канферэнцыі:
Аб’ём даклада – да 20 000 знакаў, набраных у тэкставым рэдактары MS Word (фармат .doc, .docx), шрыфт Times New Roman, 14 кегль, міжрадковы інтэрвал – 1,0, выраўноўванне – па шырыні старонкі без аўтаматычнага пераносу слоў. Палі: левае – 3 см, астатнія – 2 см; абзацны водступ – 1,25 см. Назва файла – прозвішча аўтара (напрыклад, Іваноў_артыкул.docx).
На першай старонцы справа ўказваюцца прозвішча і ініцыялы аўтара, у дужках – краіна, горад. Назва артыкула даецца праз радок вялікімі літарамі, выраўноўванне – па цэнтры, тлусты шрыфт. Асноўны тэкст размяшчаецца праз радок ад назвы.
Спіс выкарыстанай літаратуры (шрыфт Times New Roman, 12 кегль) у алфавітным парадку размяшчаецца праз радок пасля асноўнага тэксту і афармляецца ў адпаведнасці з патрабаваннямі ВАК РБ (https://vak.gov.by/bibliographicDescription). Спасылкі на літаратуру ў тэксце падаюцца ў квадратных дужках з указаннем нумара крыніцы па спісе і нумара старонкі (напрыклад: [5, с. 115]). Не дапускаецца ўключаць у спіс літаратуры крыніцы, на якія адсутнічаюць спасылкі ў тэксце артыкула.
Усе двукоссі ў тэксце – друкарскія «», унутры цытат – звычайныя “”. Выкарыстанне злучка замест працяжнік не дапускаецца.
У тэкст даклада могуць быць уключаны ілюстрацыі (фармат .jpg або .tif з пашырэннем не менш за 300 кропак на цалю). Ілюстрацыі павінны быць змешчаны ў тэксце, а таксама абавязкова прадубліраваны асобнымі файламі. Подпісы да ілюстрацый дасылаюцца асобным спісам. Агульны аб’ём графічных дадаткаў не больш за 7 файлаў.
Кожная табліца ці малюнак павінны быць згаданыя ў тэксце і мець назву (для табліц) ці подпіс (для малюнкаў). Нумарацыя даецца па парадку размяшчэння ў артыкуле. У тэксце ўказанне нумара малюнка або табліцы змяшчаецца ў круглых дужках – (мал. 1), (табл. 1).
Аргкамітэт пакідае за сабой права не ўключаць у зборнік матэрыялы, аформленыя з парушэннем патрабаванняў.
Інфармацыйны ліст і заяўка
