Іконы, што экспануюццана выстаўцы, з'яўляліся як прадметамі асабістай набожнасці, так і іканастаснымі і храмавымі абразамі. Яны дэманструюць высокае мастацкае майстэрства і адлюстроўваюць працэсы развіцця рускага іканапісу названага перыяду. Найбольш поўна прадстаўлены творы майстроў мастацкіх цэнтраў Уладзімірскай губерні (Палеха, Мсцёры), Гусліц, Выга, Паволжа. У іх творчасці ўжо ў ХІХ ст. знайшлі працяг старажытныя іканапісныя традыцыі. Таксама гледачы змогуць пазнаёміцца са спадчынай сталічных іканапісцаў - Масквы і Санкт-Пецярбурга.
Дапаўняюць экспазіцыю ікон творы рускага мастацкага ліцця. Медналітая пластыка - значная з'ява сакральнай культуры. Літыя абразкі, крыжы і складані вядомы з XI і да пач. XX ст. На выстаўцы прадстаўлены як ужо названыя віды сакральных твораў, так і састаўныя комплексы – жывапісныя іконы з урэзанымі літымі вырабамі. Яны адносяцца да стараабрадніцкай мастацкай культуры. Медналітыя іконы XIX ст. упрыгожаны рознакаляровымі эмалямі, імітацыяй, імітацыяй зерні і скані, літым і раслінным арнаментам.
Выстаўка адкрывае для гледачоў мастацкую разнастайнасць помнікаў рускага іканапісу і мастацкага ліцця XVI – пачатку XX ст. Яна ўводзіць у навуковы абарот новыя творы як музейнага збору, так і прыватных калекцый, дэманструе высокі прафесіяналізм беларускіх рэстаўратараў.
