Пад юбілейную выставу адведзены чатыры залы ў галоўным корпусе музея (вул. Леніна, 20). Яна будзе адной з самых маштабных сярод выстаў гэтай тэматыкі: экспазіцыя ахоплівае перыяд з 1939 па 1957 год і расказвае пра гісторыю фарміравання і дзейнасці Дзяржаўнай карціннай галерэі ў Мінску (1939–1941), трагічны факт яе разграблення і вывазу каштоўнасцей (1941–1944), а таксама гісторыю будаўніцтва галоўнага корпуса музея (да 1957 года).
Этап аднаўлення ў пасляваенны час праходзіў пад кіраўніцтвам легендарнага дырэктара Галерэі А.В. Аладавай. Менавіта яна ініцыявала ў 1949 годзе будаўніцтва корпуса музея па вул. Леніна, 20. Галерэя аднавіла колькасць даваенных фондаў і атрымала статус Дзяржаўнага мастацкага музея БССР, але вяртанне прадметаў мастацтва з розных крыніц праходзіла яшчэ каля паўстагоддзя.
Наведвальнікі юбілейнай выставы ўбачаць мастацкія творы з даваеннага збору музея. Самы драматычны год існавання Галерэі – 1941 – будзе пададзены як “зала-інтэр’ер”, своеасаблівая інсталяцыя моманту разрабавання.
Адмысловую навуковую каштоўнасць уяўляе створаная на аснове фатаграфій і каталогаў таго часу прэзентацыя “Засталіся толькі на фатаграфіях”.
Выстава мае комплексны гісторыка-дакументальны і мастацкі характар. Сярод экспанатаў – рэдкія архіўныя дакументы, фатаграфіі, многія з якіх экспануюцца ўпершыню, а таксама фільм-рэпартаж з ваеннага Мінска.
Усяго да паказу мяркуецца каля 200 твораў з усіх фондавых калекцый Нацыянальнага мастацкага музея Рэспублікі Беларусь і больш за 20 дакументаў з архіва музея, Нацыянальнага гістарычнага музея Рэспублікі Беларусь, Нацыянальнай бібліятэкі Рэспублікі Беларусь, Беларускага дзяржаўнага архіва-музея літаратуры і мастацтва, Варонежскага абласнога мастацкага музея імя І.М. Крамскога, Дзяржаўнага Уладзіміра-Суздальскага гісторыка-архітэктурнага і мастацкага музея-запаведніка, Омскага абласнога музея выяўленчага мастацтва імя М.А. Урубеля.
Цяпер у зборы Нацыянальнага мастацкага музея Рэспублікі Беларусь налічваецца больш за 400 экспанатаў з даваенных збораў. Па прыблізных падліках, вернутая толькі адна восьмая частка калекцыі, а лёс амаль 3000 твораў застаецца невядомым.
Выстава будзе працаваць з 5 лістапада 2024 г. па 20 студзеня 2025 г.
Куратары выставы: Усава Надзея Міхайлаўна, вядучы навуковы супрацоўнік аддзела навукова-асветніцкай работы і маркетынгу Нацыянальнага мастацкага музея Рэспублікі Беларусь і Рубашная Анастасія Уладзіміраўна, старшы навуковы супрацоўнік аддзела навукова-асветніцкай работы і маркетынгу Нацыянальнага мастацкага музея Рэспублікі Беларусь.
