Упершыню ў 2023 годзе Нацыянальны мастацкі музей Рэспублікі Беларусь прыняў удзел у Міжнародным міжмузейным праекце “Увесь свет – тэатр!”, які праходзіць 14-ы раз пад патранажам Дзяржаўнага музея гісторыі рэлігіі (г. Санкт-Пецярбург, Расія).
Удзельнікам конкурсу было прапанавана прасачыць непарыўную ўзаемасувязь розных рэлігійных вераванняў з тэатральным мастацтвам.
З даўніх часоў яркія тэатральныя традыцыі мелі шырокае распаўсюджанне ў культурах па ўсім свеце. Напрыклад, егіпецкія жрацы шырока выкарыстоўвалі тэатралізаваныя эфекты ў сваёй рытуальнай практыцы. У Старажытнай Грэцыі тэатры існавалі як адзін з відаў услаўлення бога Дыяніса, у гонар якога ставіліся трагедыі і камедыі. Зараджэнне еўрапейскага тэатра звязваюць з узнікненнем літургічнай драмы і батлеек. Тэатры краін Усходу дзівілі гледачоў сваёй разнастайнасцю: індыйскія лялечныя і драматычныя паказы распавядалі аб індуісцкіх бажаствах, а японскія пастаноўкі ўключалі не толькі рытуальныя сцэны, але і сапраўдныя элементы баявых мастацтваў.
Юныя мастакі ад 5 да 16 гадоў пазнаёміліся з антычным эпасам, славянскімі казкамі і легендамі, міфалогіяй краін Усходу, паразважалі пра разнастайнасць форм і сюжэтаў і адлюстравалі свае ўражанні ў мастацкіх работах.
Прадстаўленыя на выставе работы прайшлі адборачны этап у трох намінацыях:
– намінацыя “Свяшчэнныя тэатры свету”. Аб’ёмныя арт-аб’екты, якія паказваюць тэатральную рэчаіснасць: касцюмы, лялек-марыянетак, макеты тэатральнай сцэны з дэкарацыямі, што адлюстроўваюць сувязь з міфалагічнымі і рэлігійнымі ўяўленнямі;
– намінацыя “Самы сапраўдны герой”. Плоскасныя работы, якія адлюстроўваюць герояў міфаў і эпасаў розных краін, персанажаў рэлігійных тэатральных пастановак, дзейных асоб антычных містэрый;
– намінацыя: “Тэатр – гэта вельмі сур’ёзна!” Відэазапісы тэатралізаваных пастановак на тэму эпасаў, міфаў і рэлігійных сюжэтаў, антычных трагедый і камедый.
Творчасць удзельнікаў ацэньвала аўтарытэтнае журы: дырэктар Дзяржаўнага музея гісторыі рэлігіі Л. А. Мусіенка, намеснік дырэктара па навуковай рабоце Дзяржаўнага музея гісторыі рэлігіі А. А. Цярукова, дацэнт кафедры малюнка Санкт-Пецярбургскай дзяржаўнай мастацка-прамысловай акадэміі імя А. Л. Шцігліца А. Я. Храмых, дырэктар Санкт-Пецярбургскага Вялікага тэатра лялек А. У. Купец, кандыдат мастацтвазнаўства, прафесар, загадчык кафедры жывапісу РДПУ імя А. І. Герцэна М. У. Кузмічова.
Ад Рэспублікі Беларусь у конкурсе прынялі ўдзел навучэнцы ДУА “Дзіцячая мастацкая школа мастацтваў №1 г. Мінска імя В. К. Цвіркі”, ДУА “Гімназія № 75 г. Мінска імя Масленікава П. В.”, ДУА “Сярэдняя школа № 92 г. Мінска”, ДУА “Сярэдняя школа № 159 г. Мінска”, ДУА “Валожынская дзіцячая школа мастацтваў”, а таксама выхаванцы народнай мастацка-адукацыйнай студыі “У госці да Цюбіка” Нацыянальнага мастацкага музея Рэспублікі Беларусь і ўзорнай студыі выяўленчага мастацтва “Чароўны свет” г. Мінска.
Першае месца ў намінацыі “Самы сапраўдны герой” заняла Ганна Рабыхава, навучэнка ДУА “Дзіцячая мастацкая школа мастацтваў № 1 г. Мінска імя В. К. Цвіркі”.
У адкрыцці выставы прыме ўдзел прадстаўнік Дзяржаўнага музея гісторыі рэлігіі (г. Санкт-Пецярбург) – загадчык сектара дзіцячых праграм Бакіева Дзіяна Айратаўна.
Куратары выставы – Кацярына Шайдука, малодшы навуковы супрацоўнік аддзела навукова-асветніцкай работы Нацыянальнага мастацкага музея Рэспублікі Беларусь, і Анастасія Рубашная, старшы навуковы супрацоўнік аддзела навукова-асветніцкай работы Нацыянальнага мастацкага музея Рэспублікі Беларусь
Выстава будзе працаваць
да 4 верасня 2023 года
