Выстава дзіцячых і юнацкіх работ «Вобраз Радзімы любімай», прымеркаваная да святкавання Дня народнага адзінства і 80-годдзя вызвалення Рэспублікі Беларусь ад нямецка-фашысцкіх захопнікаў, адлюстроўвае тэму патрыятызму ў творчасці юных мастакоў, дэманструе работы пераможцаў і асобных удзельнікаў конкурсу.
У конкурсе прымалі ўдзел мастакі розных узростаў з усіх куткоў краіны, навучэнцы дзіцячых мастацкіх школ і каледжаў мастацтваў з Мінскай, Брэсцкай, Віцебскай, Гомельскай, Гродзенскай і Магілёўскай абласцей.
У работах юных майстроў вобраз Беларусі знайшоў ўвасабленне ў разнастайных жанрах і тэхніках, але ўсе творы напоўнены любоўю і захапленнем. Сюжэты конкурсных работ незвычайна разнастайныя. Вобраз Радзімы адны юныя мастакі бачаць у сельскіх абшарах, утульных вёсках, таямнічых лясах і вуліцах роднага горада. У работах іншых удзельнікаў Радзіма асацыюецца са шчодрай беларускай прыродай, багаццем архітэктурнай спадчыны і самабытнымі культурнымі традыцыямі. Творы трэціх прасякнуты захапленнем перад подзвігам беларускага народа ў Вялікай Айчыннай вайне, героямі нашай гісторыі, чые твары сталі знамянальным увасабленнем непераможнай Радзімы. Мастакі ад 10 да 22 гадоў малююць Радзіму шматстайна, але заўсёды ў непарушнай сувязі пакаленняў і часоў.
Выстава будзе экспанавацца па 29 верасня 2024 г. у галоўным корпусе музея (вул. Леніна, 20, пераходная галерэя).
Куратары выстаўкі – Юлія Мішакова, вядучы навуковы супрацоўнік аддзела навукова-асветніцкай работы і маркетынгу Нацыянальнага мастацкага музея Рэспублікі Беларусь, Маргарыта Каберна, малодшы навуковы супрацоўнік аддзела навукова-асветніцкай работы і маркетынгу Нацыянальнага мастацкага музея Рэспублікі Беларусь.
