Выстава «Праваслаўныя святыні»

18 студзеня 2024 года а 18-й гадзіне ў Нацыянальным мастацкім музеі Рэспублікі Беларусь адбудзецца адкрыццё выставы жывапісных і графічных работ «Праваслаўныя святыні» па выніках выязных мастацкіх заняткаў у Храм-помнік у гонар Усіх Святых і ў памяць аб ахвярах, выратаванню Айчыны нашай паслужыўшых, вучняў 6–10 класаў ДУА «Гімназія №75 г. Мінска імя Масленікава П.В.», прымеркаванай да Года якасці.

Настаўнікі гімназіі №75 г. Мінска імя Масленікава П.В. ужо больш за 30 гадоў вучаць таленавітых дзяцей малюнку, жывапісу, кампазіцыі, архітэктурнаму макетаванню, дызайну, графіцы і фатаграфіі. За мінулыя гады прайшло шмат выстаў у розных культурных цэнтрах нашай краіны: Нацыянальнай бібліятэцы Беларусі, Літаратурным музеі Максіма Багдановіча, Магілёўскім абласным мастацкім музеі імя П.В. Масленікава, Слуцкай галерэі мастацтваў, Беларускім дзяржаўным музеі народнай архітэктуры і побыту, Музеі «Замкавы комплекс “Мір”», Музеі «Лошыцкая сядзіба», філіяле «Чырвоны бераг» выставачнай зале сядзібы Козел-Паклеўскіх. З гонарам, павагай і падзякай штогод экспануем работы юных мастакоў у Нацыянальным мастацкім музеі Рэспублікі Беларусь.

Галоўнай тэмай экспазіцыі з’яўляецца адлюстраванне праваслаўных святынь: архітэктуры храма, навакольных жывапісных месцаў, інтэр’ераў і роспісаў сцен, яркіх вобразных кампазіцый. Вобразы Храма-помніка ў гонар Усіх Святых дазволяць неабыякавым наведвальнікам выставы прасякнуцца пачуццямі міру і дабра, любові да гісторыі і спадчыны Беларусі. Юныя мастакі перакананы, што кожная праца здольная натхніць гледача, закрануць тыя глыбокія струны душы, якія маюць патрэбу ў веры, надзеі і любові. А прыгажосць хрысціянскіх каштоўнасцяў толькі ўзмацніць пачуцці падзякі і павагі да культурнай спадчыны Рэспублікі Беларусь.

Выстава будзе працаваць да 29 студзеня 2024 года.

Падрабязней