Паважаныя калегі!
Я запрасіў вас, каб выказаць словы сардэчнай падзякі за нашу сумесную шматгадовую працу на карысць роднага музея і нашай Бацькаўшчыны.
Прыняўшы эстафету ад сваіх старэйшых калег 25 год назад, мы за гэты час эвалюцыйна, але не рэвалюцыйна стварылі сапраўдны навукова-даследчы і выставачны цэнтр з сучаснай музейнай інфраструктурай.
Сёння наш музей, можна сказаць, без перабольшвання займае вядучае месца ў музейнай сферы краіны па самых розных напрамках: рэстаўрацыйным, выставачным, навукова-выдавецкім і лекцыйным, самых розных музейных праграмах. Значна ўзрос за гэты час і прафесійны патэнцыял нашых навуковых і тэхнічных супрацоўнікаў і служб.
Гэта стала магчымым дзякуючы дзяржаўнай падтрымцы культуры і, у прыватнасці, нашага музея кіраўніцтвам краіны і дзякуючы асабістай увазе кіраўніка нашай дзяржавы А.Р.Лукашэнкі.
Менавіта пад яго кантролем і падтрымкай Прэзідэнта стала магчымым рабіць музейны квартал. Палова музейнага квартала ўжо зроблена, і гэта дае свае вынікі – пашырыліся выставачныя плошчы з сучасным музейным абсталяваннем, стварылі 14 рэстаўрацыйных майстэрняў, фондасховішча, бібліятэку, сучасны музейны кіёск, праз месяц запрацуе арт-кафэ.
Дзяржава ўкладае вялікія сродкі ў культуру і, у прыватнасці, музейную сферу. Дастаткова прыгадаць наш былы філіял Мірскі замак, над якім на працягу 12 гадоў мы як заказчык займаліся яго рэстаўрацыяй і музеефікацыяй.
Хачу падкрэсліць, што музейная сфера займае сёння вельмі важнае значэнне не толькі ў эстэтычным, але і патрыятычным плане, я б сказаў, і ў ідэалагічным: і наша місія – каб нашы людзі і асабліва моладзь ведалі беларускіх мастакоў, іх творы, ганарыліся нашай слаўнай гісторыяй, нацыянальнай культурай.
Я хачу выказаць словы сардэчнай падзякі нашым старэйшым супрацоўнікам, якія нас вучылі, перадавалі свае веды і вопыт, каб мы свята захоўвалі і працягвалі традыцыі музея і сваіх папярэднікаў.
Таксама словы ўдзячнасці нашым беларускім і замежным калегам, з якімі мы стваралі цудоўныя выставачныя і навуковыя праекты, што сталі ўжо гісторыяй.
У наступным годзе наш музей будзе святкаваць сваё 85-годдзе.
За гэты час было толькі 4 кіраўніка нашага музея. Міхалап Мікалай Пракопавіч, які быў першапраходцам, стаяў толькі два гады ля вытокаў стварэння даваеннай карціннай галерэі.
У пасляваенны час на працягу 33 гадоў Алена Васільеўна Аладава будавала новы музей, аднаўляла і пашырала разрабаваную немцамі музейную калекцыю.
Затым на працягу 20 гадоў Юрый Аляксандравіч Карачун працягнуў справу Алены Васільеўны па зборы, рэстаўрацыі і захаванні музейных калекцый, пашырэнні музея.
Мне пашчасціла пераняць эстафету ад Юрыя Аляксандравіча, і на працягу 25 гадоў мы таксама зрабілі важны ўнёсак у развіццё нашага музея і нацыянальнай культуры.
Хачу пажадаць пятаму кіраўніку нашага музея працягнуць добрую традыцыю і праз некалькі гадоў завяршыць арганізацыю музейнага квартала, падняць на больш высокі прафесійны ўзровень наш музей па самых розных напрамках яго дзейнасці.
Асабіста для мяне музей быў не толькі месцам працы, ён быў на пряцягу 25 гадоў маім родным домам. Я імкнуўся апраўдаць высокі давер калектыву музея і кіраўніцтва краіны, якія даверылі мне гэтую не толькі пачэсную, але і вельмі цяжкую місію – быць дырэктарам вядучага музея нашай краіны.
Я яшчэ раз у сваім развітальным слове выказваю самыя шчырыя словы падзякі за нашу сумесную працу, зычу вам, мае дарагія, здароўя, сямейнага дабрабыту, шчасця, хто не жанаты і не замужні – абзавесціся сем’ямі, далейшых творчых поспехаў у нашым родным доме – музеі.
Беражыце і цаніце наш музей – гэта сапраўды сакральнае месца, дзе кожны пакідае свой след у гісторыі.
Жадаю вам шчасця і міру! У добры шлях!
Ваш Уладзімір Пракапцоў.
12 чэрвеня 2023 г.
