Музыканты. Італьянская (Рымская) школа. - Нацыянальны Мастацкі Музей Рэспублікі Беларусь

Гонарам калекцыі музея з’яўляецца жывапіснае палатно “Міфалагічны сюжэт” (“Музыканты”)” рымскага мастака Джыралама Тропа (1636–1711). У гэтым творы майстар увасобіў уласнае разуменне антычнага ідэала гарманічна развітога, прыгожага чалавека, які жыве ў яднанні з прыродай. Яснасць кампазіцыі, манументальнасць і гармонія форм сугучныя стану прыроды і персанажаў карціны. Тут усё напоўнена ўнутранай музыкай, адухоўлена шчырымі і кранальнымі чалавечымі пачуццямі.

Джыралама Тропа, магчыма, вучыўся ў Карла Мараты (1625–1713), Лацара Бальдзі (1624–1703), Андрэа Сакі (1599–1661) і П’ера Франчэска Мола (1612–1666), у 1656 годзе наведваў майстэрню Марыё Нуцы, празванага Дэ Ф’ёры (1603–1673). Ён адчуў уплыў такіх буйных італьянскіх майстроў, як Джавані Батыста Гаўлі (1639–1709), Джачынта Брандзі (1623–1691) і Сальватора Роза (1615–1673). З 1656 года Тропа жыў і працаваў у Рыме і яго наваколлях, у тым ліку ў Сабіне, верагодна, таксама ў Ферары, Умбрыі і Маркене, стварыўшы нямала манументальных і станковых кампазіцый на міфалагічныя, рэлігійныя і гістарычныя сюжэты, а таксама партрэты.

У творчай спадчыне Джыралама Тропы ёсць яшчэ два творы з кампазіцыяй, падобнай карціне са збору Нацыянальнага мастацкага музея Рэспублікі Беларусь. Гэта жывапісныя палотны, якія адлюстроўваюць напаўаголеныя фігуры на фоне пейзажа, – “Пастух, які іграе на флейце” (Нацыянальны музей, Стакгольм) і палатно з калекцыі Гарадской карціннай галерэі ў Спалета.

Тропа праславіўся перш за ўсё сваімі манументальна-дэкаратыўнымі роспісамі, яго станковых кампазіцый вядома няшмат. Твор Тропы з калекцыі Нацыянальнага мастацкага музея Рэспублікі Беларусь – адзіны ў музейных зборах на тэрыторыі былога Савецкага Саюза.