Выстава “Юнацтва камсамольскае” прымеркавана да 100-годдзя УЛКСМ – Усесаюзнага ленінскага камуністычнага саюза моладзі, які афіцыйна існаваў амаль 73 гады, з 29 кастрычніка 1918-га да канца верасня 1991 года (ЛКСМБ – Ленінскі камуністычны саюз моладзі Беларусі – арганізацыйна быў аформлены ў 1920 г.).
Экспазіцыю прадставяць больш за 60 работ жывапісу, графікі, скульптуры, створаных у перыяд з 1920-х па 1980-я гг. Калекцыя Нацыянальнага мастацкага музея Рэспублікі Беларусь дазваляе паказаць камсамольскі рух гістарычна і тэматычна разнапланава – ад пачатку да апошняга дзесяцігоддзя і ў розных аспектах дзейнасці. Эпізоды грамадзянскай вайны, удзелу ў “ліквідацыі непісьменнасці”, індустрыалізацыі і калгасным руху, далучэння да розных сфер культуры адлюстраваны ў творах Б. Аракчэева, А. Глебава, Л. Зільбера, Ю. Пэна, А. Тычыны, А. Фінскага. Падзеі і героі ваенных гадоў адлюстраваны ў працах С. Вакара, В. Грамыкі, І. Давідовіча, В. Занковіча, Б. Івонцьева, М. Савіцкага. Удзел моладзі ў пасляваенным і далейшым будаўніцтве і вытворчасці, уздыме народнай гаспадаркі паказаны ў творах І. Ахрэмчыка, М. Бельскага, А. Бачкарова, В. Бароўкі, Л. Воранавай, П. Гаўрыленкі, В. Гроса, А. Лебядок-Ерамеевай, Л. Лейтмана, Л. Асядоўскага, У. Рынкевіча, В. Савіцкага, І. Ціханава, М. Чэпіка. Таксама знайшлі адлюстраванне ў мастацтве тэмы вучобы, адпачынку, спорту, службы ў Савецкай арміі – працы І. Грыгаровіча, В. Ждана, А. Заспіцкага, Г. Ізергіной, А. Кішчанкі, Р. Кудрэвіч, А. Кузняцова, Н. Лівенцавай, У. Новака, В. Пратасені, М. Селешчука.
