У гэтым годзе новы выпуск маладых спецыялістаў Мінскага дзяржаўнага мастацкага каледжа імя А. К. Глебава – дызайнераў, жывапісцаў, скульптараў і мастакоў дэкаратыўна-прыкладнога мастацтва – традыцыйна адзначыцца ўрачыстым мерапрыемствам – адкрыццём выставы лепшых дыпломных работ і ўручэннем дыпломаў у сценах Нацыянальнага мастацкага музея Рэспублікі Беларусь.
Выпускнікоў Мінскага дзяржаўнага мастацкага каледжа імя А. К. Глебава – дызайнераў, жывапісцаў, скульптараў і мастакоў дэкаратыўна-прыкладнога мастацтва – павіншуюць зоркі Беларускай дзяржаўнай філармоніі і Вялікага тэатра Беларусі, а таксама спецыялісты вядучых музеяў і мастацкіх галерэй.
Усе дыпломныя праекты, выкананыя ў самых розных відах выяўленчага мастацтва, аб’ядноўвае адно – нязменна высокі ўзровень прафесійнай падрыхтоўкі. Кожная работа, прадстаўленая на выставе, дэманструе не толькі талент і індывідуальны стыль маладога мастака, але і пераемнасць традыцый беларускай нацыянальнай выяўленчай школы. Разнастайнасць сюжэтаў указвае на шырокі кругагляд і рознабаковасць інтарэсаў і ведаў аўтараў.
Відавочна, што выстава будзе цікавая не толькі тым, чыё творчае жыццё звязана са знакамітай “Глебаўкай”, але таксама ўсім прыхільнікам беларускага выяўленчага мастацтва.
