А. Я. Архіпаў і майстры Саюза рускіх мастакоў

З 25 лістапада 2022 года ў Нацыянальным мастацкім музеі Рэспублікі Беларусь пачынае працаваць выстава “А. Я. Архіпаў і майстры Саюза рускіх мастакоў”. Новы выставачны праект прымеркаваны да 160-годдзя з дня нараджэння выдатнага мастака, жывапісца А. Я. Архіпава і 120-годдзя з даты заснавання “Саюза рускіх мастакоў” – найбуйнейшай выставачнай творчай арганізацыі ў гісторыі рускай мастацкай культуры першай чвэрці XX стагоддзя.

Шырокая юбілейная экспазіцыя ўзнаўляе мастацкую атмасферу  выстаў “Саюза рускіх мастакоў”, якія аб’ядналі практычна ўсіх найбуйнейшых дзеячаў рускага выяўленчага мастацтва пачатку XX стагоддзя, тых вялікіх майстроў, чыя творчасць глыбока адлюстроўвала духоўнае жыццё эпохі і нязменна была звязана з пошукамі самабытнай прыгажосці і своеасаблівасці Русі ў яе прыродзе, сучаснага жыцця, традыцыях і гісторыі.

Прадстаўленыя на выставе творы жывапісу, графікі і скульптуры са збору Нацыянальнага мастацкага музея Рэспублікі Беларусь знаёмяць гледача з творчай спадчынай больш трыццаці выдатных майстроў рускага выяўленчага мастацтва, у тым ліку А. Я. Архіпава, М. А. Урубеля, А. М. Васняцова, К. А. Каровіна, С. Ю. Жукоўскага, Ф. А. Малявіна, П. І. Пятровічава, А. А. Рылова, А. С. Сцяпанава, Л. В. Туржанскага, К. Ф. Юона і іншых майстроў. Дапаўняюць экспазіцыю рэдкія выданні пачатку XX стагоддзя і каталогі выстаў аб’яднання.

Работа выставы працягнецца 
да 29 студзеня 2023 года