2 кастрычніка ў філіяле Нацыянальнага мастацкага музея Рэспублікі Беларусь “Музей “Дом Ваньковічаў. Культура і мастацтва першай паловы XIX стагоддзя” сумесна з грамадскім аб'яднаннем “Беларускае геаграфічнае таварыства” пачне працу часовая мінералагічная петраграфічная экспазіцыя з фондаў ГА “БелГТ” пад назвай “Халодны камень, ёсць у цябе душа!..”.
Выстава дэманструе дзіўную разнастайнасць тэкстур і колераў нежывой прыроды і ўключае больш за 90 экспанатаў, такіх як дымчаты кварц, аметыст, цытрын і халцэдон, амазаніт, лазурыт, жадэіт, турмалін, дыстэн, везувіян, актыналіт, тальк, малахіт, азурыт, цэлесцін, ліманітавыя і гётытавыя ўтварэнні. У экспазіцыі прадстаўлены рэдкія мінералы: апаціт, барыт, флюарыт, бярыл, карунд, пераўскіт, садаліт, брусіт, кракаіт, астрафіліт і іншыя.
Узоры дэманструюць разнастайныя формы знаходжання мінералаў у прыродзе: ад асобных крышталёў і друз да жэод, нацечных утварэнняў і ўключэнняў у пародах. Экспанаты прадстаўлены не толькі ў натуральным выглядзе: некаторыя прайшлі паліроўку, што дазваляе акцэнтаваць увагу на дэкаратыўных уласцівасцях.
Выстава працягнецца да 30 кастрычніка 2026 г.
Месца правядзення: г. Мінск, вул. Інтэрнацыянальная, д. 33а, філіял Нацыянальнага мастацкага музея Рэспублікі Беларусь “Музей “Дом Ваньковічаў. Культура і мастацтва першай паловы XIX стагоддзя”.
