Аляксандр Іванавіч Лакотка – мастак, у чыёй творчасці гарманічна існуюць жывапіс, архітэктура і навука. Яго творчасці ўласцівыя жвавасць, яркасць, адчуванне свабоднай прасторы і эмацыянальнасць. Яны адлюстроўваюць маляўнічы каларыт беларускай прыроды розных рэгіёнаў. А праз поры года і ўмовы надвор’я перадаюцца разнастайныя настроі.
На выставе будзе прадстаўлена каля 60 акварэльных работ мастака. Глядач зможа пабачыць сельскія краявіды і розныя куткі Беларусі, такія як Зарэчча, Нізок, Залессе, Рубяжэвічы, Дзярэчын і многія іншыя. Мастака заўсёды натхняла і самабытнасць беларускай архітэктуры. Ён піша архітэктурныя будынкі неадрыўна ад навакольнага краявіду, дзякуючы чаму яны зліваюцца з імі ў адзіны вобраз. Сам аўтар ставіцца да сваіх твораў як да летапісу роднага краю.
Аляксандр Лакотка нарадзіўся 25 студзеня 1955 года. У 1972 годзе паступіў у Беларускі політэхнічны інстытут. Далей абараніў навуковыя ступені доктара гістарычных навук і доктара архітэктуры. З 2012 года Аляксандр Лакотка ўзначальвае Цэнтр даследаванняў беларускай культуры, мовы і літаратуры. У 2014 г. ён быў выбраны акадэмікам Нацыянальнай акадэміі навук Беларусі.
Выстава працуе па 3 лістапада 2024 года.
Куратар выставы – Крывецкая Лізавета Сяргееўна, малодшы навуковы супрацоўнік выставачнага аддзела Нацыянальнага мастацкага музея Рэспублікі Беларусь.
