19 студзеня праваслаўная царква адзначае Святое Богаяўленне, Хрышчэнне Госпада Бога і Спаса нашага Ісуса Хрыста.
Іканаграфія свята ўзыходзіць да евангельскага апавядання пра хрышчэнне Хрыста, выкладзенага ўсімі чатырма евангелістамі, і сведчыць пра пачатак служэння Ісуса ў імя выратавання чалавецтва. Назва свята – Богаяўленне – звязана са з’яўленнем у свет Святой Тройцы: паводле аўтараў Евангелляў, у час хрышчэння Хрыста нябёсы раскрыліся і на Ісуса сышоў Дух Святы ў выглядзе голуба, а голас Бога Айца сведчыў: “Гэта Сын Мой улюбёны, Якога Я ўпадабаў Сабе” (Мц. 3, 16–17).
На абразе з калекцыі НММ РБ у цэнтры кампазіцыі, у водах ракі Іардан, прадстаўлена фігура Збавіцеля, які на паўабарота развярнуўся да Іаана Хрысціцеля, схіліўшы галаву і скрыжаваўшы рукі на грудзях. Падобная выява Хрыста са скрыжаванымі рукамі на грудзях сустракаецца ў абразе сярэдзіны XVIII стагоддзя з Пакроўскай царквы в. Андронава Брэсцкай вобласці. Іаан Хрысціцель, прадстаўлены справа, робіць крок у бок Хрыста. Ён распасцірае руку над Яго галавой у жэсце благаслаўлення. Асаблівасцю твора з’яўляецца выява анёла з непакрытымі рукамі, які падтрымлівае светла-вохрыстую хусту. Як правіла, у абразах падобнага сюжэта іх колькасць павялічана да трох. Вянчае кампазіцыю адлюстраванне Духа Святога ў выглядзе голуба.
Мастацкі стыль абраза адрозніваецца складнасцю і ўраўнаважанасцю кампазіцыі, суразмернасцю поз і жэстаў, гармоніяй колеравай палітры.
Выстава будзе працаваць да 1 красавіка 2026 года.
